Pyninam ka CMYC Saiden ha ka 2nd Exhibition kum ka shlem ai jinghikai ban ïeng ha la ki jong ki kjat

Nongpoh, Nailar 26: Ka Chief Minister Youth Centre (CMYC) Saiden sa shisien pat kala ioh ban pynlong biang ïa ka 2nd Exhibition ha ka shnong Saiden, ban pyni ïaka sap ka phong ki khun samla shnong ba la saiñdur da ka centre lyngba ki jinghikai bapher bapher kum ka jingshna umsoh, ashar, thaiñ sopti bad kiwei kiwei.
Ha katei ka prokram la wan ruh ban shim bynta bad ai mynsiem da ka kong RB Lyngwa, District Sericulture Officer, Ri Bhoi District kum ka kongsan haka jingdonlang u Bah EK Lapang, Rangbah Shnong Saiden, ki nongïalam jong ka Seng Samla, Seng Longkmie, Youth Club, ki nongtrei jong ka CMYC, lem bad ki khun samla jong ka shnong Saiden.
Haba kren ha katei ka sngi naka liang u Rangbah Shnong, Bah EK Lapang, u la ai jingiaroh ïa ki kam jong ka CMYC kiba la lah ban saiñdur ïa ki sap ki phong jong ki samla nongshong shnong ha ki liang bapher bapher.
U la pynpaw ruh ba ka Dorbar Shnong Saiden kan bteng ban iatreilang bad ka CMYC ban pynbha ïa ki jinghikai ïa ki khun samla bad ki heprit, khnang ba kin lah ban pyndonkam hok ïa la ki sap ha ka ban sengkam bad ban pynmih ïa ka kamai jakpoh lade.
Ka Kong RB Lyngwa ka la ai ka jingiaroh ïa ki bor ka CMYC haka jingïatreilang bad ka Dorbar Shnong Saiden ban saiñdur ïa ka lawei ki khun samla lyngba ki jinghikai kiba pher bapher.
Kala ai ruh ka jingkitbok kitrwiang ba ka CMYC kan nang lah ban bteng ïa ki kam shakri ha ka imlang sahlang bad ban kyntu ïa ki samla ba kin pyndonkam hok ïa ki jinghikai ba ki la ioh khnang ban nang kyntiew ïa ki sap na ka bynta ka lawei jong ki hi.
La pynshongkun ïa kane ka 2nd Exhibition da ka jingïashimbynta ki heprit bad ki khun samla jong ka shnong Saiden ban pyni ïa ki sap ha ka shad bad rwai.