Ryngkat ka song ba 15 klur leit jngoh u bah Paul ïa ka Constituency u bah Banteidor

Shillong, Jymmang 25 : Watla bun ki tip bha shaphang u Thomas Jones uba la pynsah-nam ïalade kum u kpa ki dak thoh ha ka ktien Khasi hynrei ki don ruh ki khana bynrap kiba u la leh mynba u dang ïaid ha kine ki Lum Khasi kiba ym paw bha wat ha ki jingthoh ruh.
U Thomas Jones u la poi ha Sohra bad ka kurim jong u, ka Anne Jones ha ka 22 tarik u Jylliew, 1841 kum u mishoneri bad shi snem hadien, ha katei ka jaka u la pynwan-dur ïa u A,B, K, D terter haduh Y- ki dak kiba la pyndonkam ha ka thoh ka tar u Khasi Mynta.
Ha ka 23 tarik u Jymmang, 2025, ha ka jingïalang plie mawnongrim na ka bynta ban pynbit pynbiang ïa ki jaka jngohkai ha Laitlum bad shnong Mawber da u Bah Paul Lyngdoh, Myntri ba dei khmih ïa ka tnad kam jngohkai ha ryngkat u Bah Banteidor Lyngdoh, MLA ka Mawkynrew Constituency, la mih ka jingpyntip ba u Thomas Jones u la wan sah ha Mawber ha u snem 1847 kata shwa ba un phet sha Calcutta bad khlad pat ha u snem 1849.
Kane ka jingbuh mawnongrim ha ka jingïalang ha Laitlum ka long ban sdang noh ïa ki projek ban kyntiew kam jngohkai ha kine ki ar tylli ki shnong kata ha Laitlum ban shna ïa ki jingker riat ha ka mang tyngka ba 97 lak bad ki jingshna ban kyntiew kam jngohkai ha Mawber ha ka mang tyngka ba 29.97 lak.
Ha ka jingïalang la ia donlang da ki ophisar ka tnad Tourism, PWD (Roads), ki nongïalam shnong lem kiwei pat.La pynshongshit shongshngaiñ ïa ka jingïalang da ki jingrwai bad ki jingshad na ki khynnah skul bapher bapher ka shnong Laitlum.
U Bah Paul haba kren ha ka jingïalang u la ong ba ka tnad kan pynkylla Heritage Site ïa ka shnong Mawber khnang ba ka Pyrthei baroh kawei kan tip ïa ka bynta jingïadei jong ka bad u Rev Thomas Jones.
U la ong ki projek ban kyntiew ïa ka kam jngohkai kiba dang ïaid ha kane Constituency ki long ha Nongjrong ha kaba la dep ban bei tyngka haduh 5 klur, ha Mawlyngot ia kaba la mang 8 klur tyngka bad kawei pat kaba dang wad jaka ha Jongksha kumba 23 acre.
Da kaba pynshongnia ba ka long donkam ban pynbun da ka kam ban ïa kaba heh tang ka ktien, u Bah Paul, u la ong ba ka long khyllah bha pat ba ki briew ki kham ai burom bad pynlong kongsan ïa ki briew kiba kren shibun shibun.
U la ong ba ka kam bad ka tyngam ka dei ban ïaid ryngkat ryngkat bad kdew hapdeng ka jingduk ka jingsahdien, ka pang ka jhia lada ki MLA bad MDC ki dei tang ki nongsam-nia te yn nym ïohi ïa ka roi ka par.
U la kynthah da kaba ong ba ki leit sha ïewduh shu ïa khublei hynrei ka Sorkar haba ka leit ka rah ryngkat ka song pisa ba 21 klur tyngka ban pynbit pynbiang ïa ki jingdonkam ha katei ka Ïew.
Na ka liang u Bah Banteidor u la pynpaw ba ki kam ban kyntiew ïa ka roi ka par bad ka ïoh ka kot ha ka Constituency ka dei borabor da ka jingïatreilang kata naduh ki surok, ka um bam, ka koit ka khiah, ki kam jngohkai bad kiwei pat.
Hadien kane ka prokram buh mawnongrim na Laitlum, u Bah Paul ryngkat u Bah Banteidor ki la pynlong ka jingjurip ïa ki jingtrei kiba dang ïaid sha khmat ha ka shnong Nongjrong kaba dei kawei na ki jaka ba khring bha ïa ki nongwan jngohkai pyrthei.