Byrngem u MDC Tura ban ai Legal Notice ïa ka sorkar ba pynkheiñ ïa ka jingïamynjur tripartite

Shillong, Jymmang 25: U MDC ka BJP na Tura bad u Chairman barim ka Achik National Volunteers Council – Breakaway (ANVC.B) u Bernard N Marak u la byrngem ban ai da ka legal notice ia u Myntri Rangbah na ka jaitbynriew Garo halor ka jingkynnoh ba u la shetkylla ïa ki paid riewlum da kaba pynkheiñ ïa ka jingïamynjur tripartite agreement ba la soi hapdeng ka sorkar pdeng, ka sorkar jylla bad ka ANVC.
Ha kajuh ka por u la dawa ïa ka sorkar jylla ban khot ka jingïalang bad ki nongïalam ka ANVC ba la shah khang halor ki kam ba ïadei bad ka Tura medical college.
Ha ka khubor, u Marak u la ong ba ka Tura Medical College ka dei ka jingmih na ka tripartite agreement ba la soi da ka kynhun ANVC ha u snem 2014 bad ka sorkar BJP ha Delhi ha kaba ka sorkar jylla ruh ka la don bynta lang.
“U Myntri Rangbah ki Garo u la shet kylla ïa ki jingmyntoi jong ki paid riewlum da kaba pynslem ban pyntreikam ïa kane ka jingïamynjur. Ki la pynkheiñ ruh ïa ki bynta ba la mynjur hapoh ka agreement. Kumta ngim don da kawei ka lad hynrei ban ai da ka Legal notice ïa ki ba ki la pynkheiñ ïa kane ka tripartite agreement,” u la ong da kaba bynrap, “Ïa ngi la pynthikna na ka bynta ka jingim kaba bha lyngba ka tripartite agreement hynrei ïa ngi la thombor, la kem, la pynngat ha kiba bun ki case. Mynta ban ïakhun ïa ka sorkar da ka aiñ kadei ka lynti kaba ngi don bad ngi.”
U Marak u la ong ba hadien ba la ïasoi ïa ka Agreement, ka sorkar jylla kadei ban thaw da ka State Level Monitoring Committee bad dei ruh ban pynlong ïa ki jingïalang ba manla ka por ban pynbeit ïa ka jingtreikam ka tripartite agreement hynrei mynta la palat shiphew snem ki la thok bad ïa ka kynhun da ka jingkyrmen kaba thok.
“Ka la long palat 10 snem bad kim shym la don kino kino ki committee ba la thaw bad ym ruh ki jingïalang ba la khot ban khmih ïa kane ka agreement,” ula ong.
Kane ka agreement ka buh ka thong ban pynkhlaiñ ïa ki kam synshar shnong, ban kyntiew ïa ka Local Self Governance, ban pynkynriah ïa ki 13 tylli ki tnat, ka direct funding bad kiwei kiwei.
U Marak shuh shuh u la kynnoh ba ka sorkar jylla ka la shim noh ha lade ïa ki jingmyntoi ba dei jong ki tnat bad ka sorkar NPP ha GHADC ka la pyndonkam bakla ïa ki jingbei tyngka ka sorkar pdeng lyngba ka GST kaba ai ïa ka Show Cause sha ka GHADC lah bun sien.
Ïa ka kam ka koit ka khiah, ka Pule puthi, ka transport, forest, registration of birth and death, ST certificates, ki kot ba ïadei bad ka khyndew ka shyiap kum ka Non encumbrance, PRC bad kiwei da kaba beaiñ la shim noh da ka sorkar ha ka jaka ban ai ïa ki sha ki Autonomous District Council (ADC).
U Nongïalam ka BJP u la dawa ïa u Myntri Rangbah u Conrad Sangma ba un pyni ïa ka jinglong nongïalam da kaba burom ïa ka tripartite agreement ne ka jingiamynjur ki lai mamla ha ka jaka ban pynpaw ïa ki jingkren ki bym don jingkitkhlieh halor ki project ba la mang lyngba ka tripartite agreement.
Ka jylla bad ka sorkar pdeng ki la pynkheiñ ïa ka Agreement ba la soi ha u snem 2014 naba ki khlem lah ban pynlong ïa ki Monitoring Committee bad ban pynlong ïa ki jingïalang ba manla ka 6 bnai.
“Namar kata u Myntri Rangbah u dei ban pynlong shwa ïa ka jingïalang ha shwa ban shim ka rai halor ka Tura Medical College,” u la bynrap.