Ryngkat ka jingpyninam ïa ki jingbam tynrai yn pynlong ka BAM ïa ka Shillong Arm Fight-All India C’ship 2023
Shillong, Nohprah 18: Ka Bouncer Association of Meghalaya [BAM] ryngkat ka Treilang Welfare Society [TWS] lyngba ka jingkyrshan na ka tnat ïalehkai jong ka Sorkar Jylla, kin sa pynlong ïa ka rynsan ïakhun-kti ïa kaba la tip da ka Shillong Arms Fight, All India Championship 2023, bad ïa kane la pynbna da u President ka Association-Bah Junestar Kharbuli ha ka jingïakynduh bad ki ladpathai khubor.
Ka Association lyngba u President ka la pyntip ba kan sdang ïa kane ka rynsan ïakop naduh 19 tarik Nohprah, kaba hap mynta ka Sngi bad yn khylliap pyrda ha ka 21 tarik Nohprah 2023, yn pynlong ïa ka hapoh State Central Library, Shillong.
Ka synjuk ka la pyntip ruh ba ha kane ka kynti yn wan ïashimbynta da ki nongïakhun kti ba khlaiñbor ka Jylla bad kumjuh ruh ki ba na bar, kum napoh Haryana, Delhi, Uttar Pradesh, Kerela bad kiwei kiwei.
Ha kane ka Shillong Arm Fight ka Association ka la khreh ruh ban pynïakop ïa ki briew kiba don jingduna ha ki dkhot met (physically Disabled) kiba ju shimbynta barabor, bad pynshlur ruh ïa kiwei de ba kin wan shakhmat ban shimbynta ha kane ka Shillong Arm Fight-All India Championship 2023 bad ruh ban shim ïa ka kum ka rynsan ban pyni ïa la ka jong ka sap.
Ka song tyngka kaba la mang haba kynthuplang ban sam sha ki nongjop ha kikyrdan bapher bapher ka long haduh 2.15 lak tyngka.
Ha kane ka Shillong Arm Fight-All India Championship kin don ruh katto katne ki khlur ïakhun kti kiba la paw ha ki rynsan ïakop ha kylleng, kiba kynthup ïa ka Yogesh chaudhry, Chetma Sharma kiba la ju mih madan ha ki rynsan ïakhun shabar Ri.
Napoh ka jylla ki nongïakhun kti kiba la kham paw ki kynthup ïa ka Magaret Pathaw lahduh ha u snem 2022, nangta ka Aiboklin Rina bad ka Banrika Kharkongngor kiba la ju mih madan ha rynsan ïakhun kti hapoh Ri bad kymjuh ruh shabar. La pyntip ruh ba u Hubert Paliar ryngkat bad u Shanborlang Siangshai, ki arngut ba la kham paw napdeng ki Para Athlete ka jylla kin sa shimbynta ha katei ka jingïakop.
La pyntip ba mynta ka sngi 19 tarik ka Association kan pynlong ïa ka weigh-in lane ka jingthew kilo ban phiah kyrdan na bynta baroh kito ba wan shimbynta sha kane ka Arm Fight bad ha ka 20 tarik yn sa ïoh sdang ïa ka jingïalehkai.
Yn wan plie pyrda ïa kane ka lympung da ka Kong Ampareen Lyngdoh-Myntri ka Koit ka Khiah jong ka Sorkar Jylla bad ha ka sngi pynkut, kata ha ka 21 tarik yn khylliap da u Myntri Rangbah ka Jylla-u Conrad Sangma.
Nalor ka jingpynlong ïa ka jingïakhun kti, u Bah Kharbuli u la pynpaw ruh ba kan don ruh ka jingpyn-i-nam ïa ki jingbam tynrai khasi bad ruh ki jait jingïalehkai tynrai.