Mawkyrwat, Lber 09: Kum ka dak jong ka jingaimynsiem na ka bynta uwei samla jong ka shnong Laitmawsiang, East Khasi Hillls District, na ka liang ka Khasi Student’s Union (KSU) jong Sawsym-per Circle bad Laitmawsiang Unit ki la ïoh ban pynkup burom bad ai mynsiem ïa u samla Banskhemlang Mawlong u samla uba ïoh ban leit ïashimbynta na ka kynhun jong ka Jylla Meghalaya ha ka jingïalehkai kynjatbol na ka bynta ka Santosh Trophy kaba la long ha ka ri Saudi Arabia ha kine ki taïew ba la dep.
Ka khyrwoh khubor ba la phah lyngba u Belingstar Lyngkhoi, President bad u bah Macdonald Marba-niang, General Secretary ka KSU Sawsymper Circle ki la ai ka jingkitbok kitrwiang ïa u samla Banskhemlang Mawlong ba un nang kiew shaphrang ha kane ka kam ïalehkai jong u bad ba un nanglah ban wanrah ka nam ka burom ba khraw ïa ka ri, ka jaidbynriew, kumjuh ruh ka buh ïa ka jingkyrkhu kyrdoh ïa ki kmei ki kpa ba kin nang ïoh ka met ba koit ba khiah bad kin nang lah ban ai ka jingkyrshan ba pura ïa la u khun ba un nang ïoh lad shuh shuh ban ïoh ïalehkai bha ban un nangkiew ïa ka sap kaba u don.
“Ngi sngwthuh ba khlem ka jingpynshlur bad ai mynsiem na ka ïing ka sem baroh ki sap ki phong ki jong ki khun ki kti kin long kiba lehnohei”, ong ka kyrwoh na ka seng.
Ïa katei ka prokram jingpynkup burom la pynïaid da u President ka KSU Laitmawsiang Unit u samla Shanboklang Lyngdoh.
