Pynshai paidbah ka Woodland Hospital ha ka jingrakhe sngi Khyllai

Ka jingpang khyllai kam ju kham pyni dak: Dr. Indakiewlin Kharbuli

0

Nongstoiñ, Lber, 9: Ka Woodland Hospital Shillong ha ka sngi palei jong ka taiew, ka la hiar ban ai jingpynshai paidbah halor ki jingpang khyllai ha Nongstoiñ, kaba long kum shi bynta ban rakhe ïa ka sngi ka jingpang khyllai ne ‘World Kidney Day’.
Ïa katei ka jingïalang ai jingpynshai paidbah la pynlong hapoh ka Market Complex ha ïew Nongstoiñ ha kaba ka Dr. Indakiewlin Kharbuli MBBS MD (Medicine), DM (Nephrology) Consultant Nephrologist ka la shim ïa ka bynta ban ai jingpynshai.
Ka Dr. Kharbuli haba ai jingkren, ka la ong ba ka jingpang khyllai ka dei ka jingpang kaba pynïap suki suki, ha kaba bun ki nongpang kiba don jingshitom ha u khyllai kim tip ba ki pang khyllai namar ka jingbym don ka jingpyni dak.
Ka la ong ruh ba ka jingpang khyllai kadon haduh 5 bynta, kata ka bynta ba 1 haduh 4 lah ban sumar da kaba ai dawai. Hynrei kaba bynta kaba 5 dei kaba la jur bad hap pynkhuid ïa ka snam lyngba ki kor ne Dialysis bad ruh ban bujli ïa u khyllai.
Ka la ong ba ki lad jingïada na ka jingpang khyllai, ka long ban dih 2 litar ka um ha ka shi sngi, kiar na ka jingbam doh masi, kiar na ki jingbam mluh sangeh ka dih ki dawai ktha bad sangeh sih sikret lane kyiad.
Ha kane ka sngi, ka la don ruh ka jingsumar ei ïa ki paidbah kiba la wan ban shah sumar ha ka Woodland Hospital Blood Collection Center kaba don ha ka dong Mawpun jong ka shnong New Nongstoiñ.

Leave A Reply

Your email address will not be published.