Ïaid shait shait ka jingpyntrei ïa ka surok na Mawphanlur sha Mawthadraishan
Ki matti u Bah Brol Nongsiej MLA barim ka Mawthadraishan
Nongstoiñ, Lber, 9: Ka jingpyntrei ïa ka surok kaba shi kilomitar shiteng na Mawphanlur shaduh kliar lum Mawthdaraishan, ka la ïaid shait shait la kumba ar bnai tam haduh mynta. Katei ka surok ka pynïasoh bad ka surok kaba mih na Nongshillong kaba ïaid lyngba ka shnong Domkseh haduh u lum Mawthadraishan, kaba dei ka jaka ba ki nongshnagkai suwari ki sngew tynnad eh ban leit shangkai pyngngad.
Ha kine ki snem ba la dep, la dep shna ïa ka lynti ïaid kjat kaba sdang naduh ka jaka sah jong ki nongleit shangkai ha Mawphanlur, haduh ban da poi ha lum Mawthdaraishan. Ka jingshna ïa katei ka lynti ïaid kjat ruh ka la ai jingmyntoi shibun ïa kiba kwah ban ïaid kjat bad ha shilynter jong katei ka lynti ïaid kjat, ki don ruh ki jaka shongkai kiba la shna itynnad bha. Hynrei na ka jingdon jong ki blang ki masi ba ki nongshong shnong ki ri, ka la pynjaboh ïa kitei ki jaka shongkai, namar ba khlem don jingker bad ha ka por ba slap ki blang ki masi ki leit rung ban rieh na u slap bad ka lyer.
Ha kane ka snem pat da ka jingtrei shitom jong u bah Brolding Nongsiej MLA ka Mawthadraishan, ka sorkar ka la pynïoh ïa katei ka surok. Hynrei sniew bok pat ba u bah Nongsiej ha kane ka kynti u la shah rem noh. Pynban wat la u shah rem ruh, yn ym lah ban len ba katei ka surok na Mawphanlur sha Mawthadraishan, ka dei ka matti ba u bah Brolding u la trei shitom na ka bynta ka jingmyntoi jong ki paitbah katei ka thaiñ.
Ynda la dep bha ïa katei ka surok, ki nongshangkai suwari kin kham sngew tynnad arshah, namar ha Mawphanlur ki la don ki jaka sahmiet kiba biang bad ban leit sha kliar lum Mawthadraishan ka la suk, ym kum baroh shi katta ba lada ki nongshangkai suwari ki sah miet ha Mawphanlur bad lada ki kwah ban leit sha kliar lum Mawthadraishan, ki hap ban hiar sha Markasa haduh Nongshillong bad ïaid lyngba ka Domkseh. Hynrei ynda la dep bha ïa katei ka surok pat, lada ki kiew na Nongshillong sha kliar Mawthadsaraishan bad leit sahmiet ha Mawphanlur ka la suk shibun nalor ba ka la jan bha.