Rung semi ka Christ Church, mynta yn ïakhun sa ki 6 kynhun ba dang sah

Shillong, Nailur 05: Ka lympung ïalehkai phutbol kaba dei na ka bynta ki skul kaba la tip kum ka IXth Inter School Knock-Out Football Tournament 2023 kaba la pynlong ha Madan Heh Mini Stadium Mawlai Phudmuri bad ba la pynïaid da ka Federation of Khasi Jaintia and Garo People, Mawlai Circle, ka la jam mynta sha ka quarter final.
Haba phai sha ka jingïakhun quarter final kaba nyngkong kaba la long hynnin ka Lah Sngi U Blei, ka Christ Church (Skul Step) ka la ïoh ban rung sha ka semi final hadien ba ka la khur ïa ka namjop pyrshah ïa ka OM Roy Memorial.
Ha ka jingïakhun jong kine ki ar kynhun, ym shym la don satia ba lah ban pynkhihjar haduh ba kut jong ka por ba la buh kaba la pynlong ïa kine ki ar kynhun ban jam sha ka tie breaker.
Ha ka jingïashut ïa ka tie breaker ki khynnah lehkai ka Christ Church (Skul Step) ki la lah ban pynkhyllem noh ïa ka OM Roy da 4-3 ban jam sha ka semi final jong kane ka lympung.
Mynta ka sngi, ka 6 tarik Nailur yn sa ïoh ban pyntyllun sa ïa ki lai tylli ki jingïakhun hapdeng ki hynriew kynhun ba dangsah ki ban ïaknieh rung sha ka semi final jong kane ka lympung.
Na ka liang jong ki nongpynïaid ki la pynkhreh ïa ka jingïalehkai kaba nyngkong ha ka por 1 baje mynsngi, bad ka jingïalehkai kan long hapdeng ka Nongkwar Presbyterian ka ban aireng ïa ka Christ Church (Skul Sngi). Nangta ka jingïakhun yn sdang biang ïa ka jingïalehkai hapdeng ka Mawlai Presbyterian pyrshah ïa ka May Queen ha ka por 2 shiteng mynsngi. Ka jingïalehkai kaba khadduh jong kane ka sngi kan long hapdeng Umrynjah Presbyterian pyrshah ïa ka Nongkwah Secondary School