Shillong, Nailur 05: Hadien ba ka Aiba FC ka la ïoh ban rah namlahduh ha ka Samkhamti Summer Cup Under-20 kaba ladep dang ha kane ka snem, kane ka kynhun ka la ïoh pat ban khur sa ïa ka burom jong ka Independence Cup jong ka Samkhamti kaba II hynnin ka Sngi Saitjaiñ jong ka taïew ba ladep.
Ka jingïalehkai ka ba la long hynnin ka 2 tarik Nailur ha madan Urkaliar ka la long hapdeng ka Aiba FC pyrshah ïa ka Teer Counter FC.
Ha kane ka sngi la ïa don ryngkatlang u Bah Samborlang Diengdoh bad ruh i Kong Khamtilin Massar. Haba ai jingkren ha kane ka sngi, na ka liang jong u Bah Samborlang u la ai khublei ïa baroh ar kynhun , kiba kynthup ïa ka Aiba FC bad ruh ka Teer Counter FC bad ruh na ka bynta ki rangïalehkai kiba ïakhun ha ka Super Division kiba la wan ban ïashimbynta ha kane ka lympung.
Ka jingïakhun ka la jam sha kaba kut ha kaba ym shym la don ba lah ban pynïakhlad ïa ka jingïakhaid hapdeng kine ki ar kynhun haduh kaba kut jong ka por ba la buh. Bad kane ka la pynlong ïa kane ka jingïalehkai ban jam sha ka tie breaker ban rai ïa ka nongjop.
Ha ka jingïashut ïa ka tie breaker ka kynhun lehkai jong ka Aiba FC ka la lah ban jop da 7-6 ïa ka Teer Counter ban rah syndon ïa ka namlahduh, ka namtam ha kane ka jingïalehkai khamtam ha ka jingïashut ïa ka tie breaker ka la leit sha u rangapkol ka Aiba FC, u Ebenson Warbah u ba la lah ban ïada haduh 3 tylli ki penalty ban btin lynti ïa ka kynhun sha ka burom.
La ïoh ruh ban sam ïa ki khusnam kiba kynsai-tam jong kane ka Tournament, kiba kynthup ïa ka nam Top Scorer kaba la khur da u Verjelous Shylla jong ka Nala Rympei, Best Goalkeeper ba la khur da u Ebenson Warbah jong ka Aiba FC bad khadduh ka nam Best Player kaba la khur da u Fairming Suting jong ka Aiba FC..
