Shillong, Ïaïong 07 : Ka PFR Football Academy Senior Team ka la ïoh ban rung sha ka Semi Final jong ka ATPA Shield Football Tournament hadien ba ka la lah ban pynliem noh ïa ka ka Global FC kaba na Gossaingoan da 2-0 kol ha ka jingïakhun Quarter Final kaba la long ha ka 5 tarik Ïaïong 2023 ha Jorhat.
Haba phai sha kane ka jingïalehkai, ka PFR ka la ïoh ban pynshat bol bad ïalehkai bha naduh kaba sdang jong ka jingïalehkai. Ka jinglah jong ki rangïalehkai ban ïapashat bol, ka la pynklumar ïa ki rangïalehkai dien jong ka Global FC kiba ym shym la bah ban khanglad ïa ka jingïoh thep kol ka PFR.
Ka PFR Football Academy hadien bun bun sien ba ka la ïoh ban ñion sha ka kut jong ka Global bad da ka jingïai pyrshang ban thep kol, khatduh ka la ïoh kabu kaba nyngkong hadien ba u Fairming u la thep ïa ka shi kol.
Lyngba katei ka shi kol ka la nang ai mynsiem shuh shuh ïa ka kynhun kaba la nang ïakhun tyngeh khlem da ailad ïa ka kynhun pyrshah ban pynphai kol. Katba ki minit ki dang ïaid ka jingïalehkai ruh ka la nang lah shilliang, ha kaba ki rangïalehkai ka PFR ki la tur beit sha ka kut jong ka Global FC.
Da ka jingïai pyrshang bad minot thop khlem kynran dien, u Max u la ïoh ban thep ïa ka kol kaba ar na ka bynta ka PFR Football Academy kaba la lah ban teh lakam khlem da ailad thep kol ïa ka Global FC bad pynliem da 2-0 kol bad ïoh rung syndon sha ka semi-final. Ha kaba kut jong ka jingïalehkai la sam ïa ka khusnam shimet ha kaba u Samlang Rympei jong ka PFR u la ïoh ïa ka nam Player of the Match.
Lyngba kane ka jing jop ka PFR Football Academy kan pynkhreh ïalade ban ïakhun ïa ka Semi Final ka ban long ha ka 9 tarik Ïaïong 2023.
Ïa kane ka lympung la pynïaid da ka Jorhat District Sports Association kaba la pynlong ha Jorhat Assam.
