Syllad biang ka khlam sniang ha rilum Garo khnang ban shoh doh bad die ha ki 2 tylli ki shnong

0

Shillong, Ïaiong 05 : Ka sorkar jylla ha ka sngi Balang ka la pynbna ba ka khlam sniang ka la syllad ha ki ar tylli ki shnong kiba ka pdeng jong ka jingsdang kadei ha ka shnong Dalu bad Asigare kiba hap ha Dalu Block, West Garo Hills
Katkum ka kyrwoh na u Secretary jong ka tnad AH & Veterinary Dr Manjunatha C, la ong ruh na ka daw ka jingsyllad jong katei ka khlam ba la tip kum ka kum ki shnong kiba don ka jingpang sniang ba la tip kum ka African Swine Fever, na ka liang ka sorkar ka la pyrkhing tyngeh ban shohdoh ne khaïi sniang ha kitei ki jaka ba shah ktah.
Katei ka jingbthah ka ong ruh ba kitei ki jingmaham kin pyrkhing bha ha ki 1kilometer sawdong jong katei ka jaka ba jia (Infected Zone) bad ruh baroh ki shnong kiba don 10km sawdong.
Katkum katei ka jingbthah la ong ba ym dei ban don ka jingpynpoi ïa ki sniang lane kino kino kiba ïadei bad ki sniang, ka doh, ki jingbam, ki dawai na ki jaka ba shah ktah sha ki surveillance zone bad dissease – free zone.
La kyntu ruh ïa ki trai jong ki jaka ri sniang ba ki dei ban leh khuid ha ki jaka treikam bad khanglad ïa ka rung ka mih jong ki briew sha kitei ki jaka. La ong ruh ba dei ban don ka jingpyrkhing wat ïa ka rung ka mih jong ki briew ha kito ki jaka ba shah ktah.
Haba ïadei bad ki kali la ong ba yn shah ïa ki ban mih na kitei ki jaka ba shah ktah tang hadien ba la dep ban pynkhuid bad synreit dawai.
Lada don ki sniang ba ïap, la bthah ba ym dei satia ban rah shabar jong ka jaka hynrei dei ban pynkhuid beit ha ki jaka ba jia. Hynrei la ong pat ba lada jia ba ym lah ban pynkhuid hangto hi, ki tnad ba dei hapoh ka jingpeit jong ka District Veterinary office kan hap ban bud pyrkhing ïa ki kyndon bad pyndonkam ruh da ki kali kiba ym lah ban lait ne pei.
La bthah ruh ba ïa ki sniang ba la ïap dei ban pynkhuid da kaba tih da ka thliew ba jylliew bha ryngkat da kaba theh shibun ka shun ba ym ban shu bret sha ki wah, ki nala ne ki tyllong um.
La bthah ruh ba dei ban khang shwa shipor ïa ka jingshohdoh bad ka jingdie ïa ka dohsniang ha kito ki jaka ba shah ktah.

Leave A Reply

Your email address will not be published.