Dawa ka NEMP’sForum ïa ka Sorkar ban mang 10 klur shi snem ban pyntbit ïa ki samla
Ba duna palat kiba pas IAS na North East
Shillong, ïaïong, 05: Ka North East MP’s Forum (NEMP’sF) ha ka sngi Balang ka la phah da ka jingthoh sha u Myntri ka tnat Development of North Eastern Region (DoNER) u G. Kishan Reddy ban mang pisa kumba 10 klur shi snem na ka bynta ki phra tylli ki jylla hapoh ka thaiñ Shatei Lammihngi kum ka jingpynsdang ïa ka Scholarship Scheme khnang ba kan ïarap ïa ki samla pule ban pas ïa ki eksamin IAS/IPS/Civil Services na ki jylla ka thaiñ Shatei Lammihngi.
Ha ka dorkhas ba la soi da u Secretary General u Bah Vincent H. Pala, ka ka NEMP’s Forum ka la ong, “ka jingdon jong kiba pas ïa ka eksamin IAS/IPS/Civil Services na kane ka thaiñ Shatei Lammihngi ka duna bha, lait noh tang katto katne ngut kiba la pas na ka jylla Manipur bad Assam. Nalorkata, kane ka jingduna ka la nang hiar haduh katta katta. Wat hapdeng ka jingtrei shitom jong ki Sorkar Jylla, ha ka jingpynlong eksamin ha u snem 2017 ki don tang 24ngut kiba la pas na ka thaiñ Shatei Lammihngi, kata ruh kaba la bun tam ha kane ka thaiñ, watla ka la long kaba duna bha. Naduh katei ka por, ka resol ka la hiar arsut ha ka jaka ba kan kiew,” ong ka dorkhast.
“Haba kheiñ lang, 13 ngut ha u snem 2018, 11 ngut ha u snem 2019 bad 9 ngut ha u snem 2020 ki la pas na kane ka thaiñ Shatei Lammihngi. Ki don bun ngut ki samla kiba proh jabieng na ka thaiñ Shatei Lammihngi, hynrei kim shym la lah ban pas na ka daw ka jingbym don ki lad jingpyni lynti bad ki jinghikai kiba biang,” ong ka NEMP’s Forum.
“Namarkata, ka DoNER ka donkam ban tuklar noh mardor ïa kane ka kam khnang ban ïoh sei ïa ki samla kiba dei hok ban pas ïa ki eksamin Civil Service khnang ba kin ïoh lad ban leit sha ki jaka shah hikai pyntbit ha Delh lane ha ki jylla. Na ka bynta kane, nga kyntu ïa phi ban pynmih ïa ka Scholarship Scheme kaba 10 klur shi snem. Ïa kane ka (pisa) yn sa lah ban ïoh ïa ka Coaching Institute kaba paw ka ban dup lah ban ai jingïarap bad ai jinghikai ai ki samla ki ban shah pyntbit na ka thaiñ Shatei Lammihngi,” ong shuh shuh ka NEMP’s Forum.