Rai ki Harijan ban leit ïakynduh ïa ka Sorkar Jylla ha ka 10 tarik

0

Shillong, Iaiong 05: Ka Harijan Panchayat Committee (HPC) mynta ka sngi Balang kala shim ïa ka rai ban leit ïakynduh ïa ka sorkar jylla haka 10 tarik mynta u bnai halor ka jingthmu jong ka sorkar ban pynkynriah noh ïa ki 342 tylli ki Longïing kiba sah ha Them ïew Mawlong sha ki quarter jong ka Shillong Municipal Board (SMB) kaba don ha Bivar Road.
ïa kane la pyntip da u Secretary ka HPC u Gurjit Singh uba la ïathuh ba ïa kane ka rai ban ïakynduh ïa ka sorkar jylla la shim hadien ka jingïalang jong baroh kiba sah ha Them ïew Mawlong ka ba long mynta ka sngi .
U Gurjit ula ïathuh ba ka HPC ka la pynkhreh ruh ïa ka jubab halor ka Blueprint bala phah daka sorkar sha ka HPC, kaba tyrwa ban pynkynriah noh ïa ki 342 tylli ki longïing na Them Metor.
“Mynta ka sngi, haka jingïalang hapdeng kiba sah ha Them ïew Mawlong, ka HPC kala dep ban pule ne bishar bniah ïa ka Blueprint ba la phah daka sorkar bad ha ka 10 tarik mynta u bnai ngin sa leit ïakynduh ïa ka sorkar ban jubab halor kane ka jingthmu ban pynkynriah noh ïa ngi sha kawei pat ka jaka” ong u Gurjit.
U Gurjit ula ong ba ka jingïakynduh khatduh hapdeng ka HPC bad ka sorkar kadei ha ka 29 tarik Nailur 2022 bad haduh mynta ka sorkar ruh kam shym la khot ïakren ïa ki hynrei kala shu phah jubab tang ïa ka Blueprint bala phah sha ka HPC.
Ula bynrap ba haduh mynta ka HPC ne ki paidbah ba sah ha Them ïew Mawlong kim don jingtip halor kita kiba sah beaiñ bad ïa kane ruh la pynksan hi da Symbud Myntri Rangbah ka jylla bah Prestone Tynsong ba ym don wat tang kawei ka Longïing kaba shong beaiñ ha Them ïew Mawlong.

Leave A Reply

Your email address will not be published.