Shillong, Ïaiong 05: Ka videokaba la ringdur ïa ka jingsiang rong surok torti jong u Kontrakor hajan ka Meghalaya Police Public School (MPPS) ha Mawlai Mawroh ka la saphriang stet haduh katta katta ha ka rynsan Social Media ha ka sngi Balang.
Katkum kane ka video, la sakhi ba ïa ka jingsiang rong ka long kaba shu leh tang dep namarba ka suk haduh katta katta ban khlong da ka kti ïa ka rong ba ladep siang thymmai.
Ha kine ki khyndiat sngi, la sakhi ïa ka jingsiang rong ha ka surok jong ka shnong Mawlai Mawroh terter shaduh ka surok ban mih sha Golflink kaba dang ïai bteng haduh ka sngi Balang.
Katkum ka jingïathuh jong u Kontraktor, ka video ba la saphriang ha ka social media ka dei ka bynta jong ka surok ba u la pyntrei ka dei kaba don hajan ka Meghalaya Police Public School bad ïathuh ruh ba ka jinglah ban shu khlong da ka kti ïa ka surok ka dei namarba ïa kane ka surok la pyntrei ha ka por slap bad dei namarkata, ka rong ba ki nongtrei ki la khleh bad ki siang kam bat shuh ïa ki maw, kaba pynlong ïa ka rong ban lait noh watla haba ladep ban tylliat da ka Road Roller.
Ki dkhot ka Hynñiewtrep Integrated Territorial Organisation (HITO) Mawlai Circle tang shu ïoh ïa ka Video ba la saphriang ki la leit ban jurip mar mar bad ki la dawa ruh ïa ka tnat PWD (Roads) ban phah sangeh shwa ban pyntrei ïa kane ka surok tad haduh ba ka PWD (Roads) kan da phah jurip bad phah tohkit halor ka rukom pyntrei ïa kane ka surok.
