Ba shu shaniah ha ki kompeni ka Sorkar Pdeng mad ka jylla ïa ka jinglip bording da ki bun kynta

Shillong, Ïaïong 05: U Myntri ka tnad Bording jong ka sorkar jylla u AT Mondal u la ong ba ka jingshaniah ka jylla ha ki kompeni ka sorkar pdeng ban pyndap bording ïa ka jylla ka la pynlong ïa ka jylla ban mad ïa ka jinglip bording ba da ki bun bun kynta lada ka don ka jingthut na kine ki kompeni ka sorkar pdeng. U la ong ruh ba sa kawei ka daw ba ka jylla ka mad ïa kane ka jinglip bording ka dei namar ka jingtyrkhong um na ki jaka pynmih bording jong ka sorkar jylla na ka daw ka jingtyrkhong slap.
Haba kren sha ki lad pathai khubor u Abu Taher Mondal u la ïathuh ba ka jingkhang ki jaka pynmih bording jong ki kompeni ka sorkar pdeng ba kynthup ïa ka Khandong and Kopili Hydro Electric Project ka la nangpynkynton ïa ka jingduna bording nalor ba ka don ka jingtyrkhong slap ban pyndap um ïa ki pung pynlang um ban pynmih bording jong ka sorkar jylla.
U la ong ba ka jinghap khang shipor na bynta ka jingmarmot ïa ki jaka pynmih bording jong ka sorkar jylla ka dei a kawei pat ka daw ba ki paidbah ki hap mad ïa ka jinglip bording ba bun bun kynta ha ka shisngi.
Shuh shuh u la ïathuh ba ka jylla ka dei ban ïohbhah na ka jingpynmih bording jong ki kompeni ka sorkar pdeng ka long haduh kumba 72 million units bad tang na ki kompeni ka sorkar jylla ka jingpynmih bording ka long kumba 16 million units.
“Kumba long mynta ka jingïoh bording ka dei 88 million units hynrei jingdonkam bording ha ka jylla ka long 200 million units bad ka jingduna bording ka long haduh 112 million units bad kane ka dei ka jingeh kaba khraw kaba ngi mad kum ka jylla,” u la ong.
Haba kylli halor ka jingktah ka jingkhang ki projek pynmih bording ka sorkar pdeng u AT Mondal u la ong, “Ka jingkhang ki projek pynmih bording ki kompeni ka sorkar pdeng ba kynthup ïa ka Kopili stage-I ba lah ban pynmih bording 200 MW ha kaba ka jylla ka dei ban ïoh bhah 35MW, ka Khandong Power Station ba lah ban pynmih bording 50 MW ha kaba ka jylla ka dei ban ïoh bhah ba 8.51MW bad kumjuh ïa ka Kopili stage-II ba lah ban pynmih bording 25 MW ha ka bhah ka jylla ka dei 3.45 MW, ka jingkhang kine ki projek pynmih bording ki kompeni ka sorkar pdeng ki la ktah haduh katta katta ïa ka jingïoh bording ka jylla”.
“Kumba long mynta ka Myntdu Leshka Hydel Power Project ki artylli ki unit ba pynmih bording mar 42MW ruh la hap ban khang shipor bad kumjuh ki ar tylli ki projek ha Umïam ba pynmih bording mar 60MW la hap ban khang namar ka jingmarmaot bad ka jingpynbha ïa ki,” u la bynrap.
Shuh shuh u la kubur ba kane ka jingpynmih bording ba duna kaba hap ban pynlip bording ha ka jylla da ki bun bun kynta ka la hap ban mad ïa ka jingeh kaba khraw.
“Na ka liang jong ngi ngi la trei shitom baroh 24 kynta kumno ban pynsting ïa kane ka jingeh kaba ki paidbah nongthang bording ki hap ban mad,” u la ong.
U la ïathuh ba ka jylla ha ki bnai Lyiur namar ka jingther u slap ka don ka jingpynmih bording kaba palat ban ïa kaba ka jylla ka donkam bad ïathuh ba ka sorkar ha kum kine ki bnai ka ju ai kylliang ïa kine ki bording sha kiwei pat ki jylla bad ynda ka jylla ka donkam bording kine ki jylla ki pynphai noh ïa ka bording kaba ka jylla ka ai sha ki.
“Kumba long mynta ka jingdawa bording ka jur bha bad ka dor ka bording ruh ka rem bad kine ki kompeni ba ju ai bording kim mon ai bording shuh ïa ngi bad kane ka pynlong ïa ngi ban poi haduh une u pud,” u la ong.
U la ïathuh ruh ba na ka liang ka sorkar ka ka la shim ïa kiba bun ki sienjam ban weng ïa kiba kum kine ki jinghap pynlip bording da kaba soi ïa ki MoU bad ki kompeni pynmih bording hynrei namar kiba bun ki daw ba wat kine ki kompeni kim lah ban pynmih bording ‘bad na ka liang jong ngi ngi kyrmen ba ha kine ki snem kiban wan ngin lah ban weng syndon ïa kiba kum kine ki sohkyrdot ba la teh slem ïa ka jylla,” ong u AT Mondal.
Haba kylli sa katno ka MeECL ka dang shah ram ban siew pyndep, u AT Mondal u la ong ba um don satia ïa ka jingkhein kaba paka namar ba katei ka jingsiew kadei kaba la siew man la ka por bad u la pynthikna ba ka sorkar ka dang kyrshan ïa ka MeECL kumta ym dei ban khuslai eiei halor kane ka bynta.