Rongtuh ki runar haduh 24 tylli ki battery na u Tower mobile ha Lalmatti, kem ki pulit 2 ngut

Nongpoh, Nohprah 29: 2 ngut ki runar bala suba donkti ban tuh haduh 24 tylli ki battery na uwei u tower Airtel ba don haka shnong Lalmati ha Ri-Bhoi kila shah kem noh haki pulit jong ka Pilangkata Outpost naka jaka sah jong ki haka 26 tarik mynta u bnai hadien ba ki pulit kila pynlong ka jingtohkit bad ïoh ka jingtip kaba thikna.
Kitei ki 2 ngut ki runar bala shah kem noh haki pulit la tip kyrteng kum u Bipul Maraknaka shnong Umdem bad u Pewarson Marak naka shnong Lalmati bad naka liang ki pulit kila ïoh ban kem ïa kitei ki 2 ngut naki jaka sah jong ki.
Hadien ka jingïoh kem ïa kitei ki 2 ngut naka liang ki pulit ka Pilangkata Outpost hapoh ka jingïalam u Nurul Islam kum u OC ka Pilangkata Outpost kila leit ruh ban khynra ïa ka jaka buh ïa kitei ki battery bala dept uh na kawei ka jaka kaba don haka thaiñ Byrnihat, Amtola Assam, hynrei naka liang ki pulit kim shym la lap shuh hadien bala pynkit noh da uwei briew shawei pat ka jaka, bad naka liang ki pulit ki dang wad sa ïa u trai jong katei ka jaka hadien ba u la phetrieh noh.
Shuh shuh ha katei ka jingleit khynra naka liang ki pulit kila ïoh ruh ban kurup kawei ka kali Bolero Pick-up kaba don ïa u Number AS 01 NC 9804 bala pyndonkam ban kit ïa kitei ki battery bad naka liang ki pulit ki dang pynlong ka jingtohkit kaba jur ban lap shuh shuh ïa kiba donkti ha katei ka kam tuh, bad la register mukotduma pyrshah ïa kiba donkti ha katei ka kam tuh.