Shillong, Nohprah 29 : U Nongïalam ka Congress uba dei ruh u MP Lok Sabha u la ong ba ka la donkam eh ïa ka sorkar pdeng ban pynkylla noh ïa ka Aiñ tih marpoh khyndew (Mining Laws) khnang ban lah pyntreikam ïa kiwei de ki rukom tih mar poh khyndew ha ka jylla Meghalaya namar kane ka jingtih pynmadan beit ïa u lum kam ïahap satia ha kane ka thaiñ khamtam ha kane ka jylla Meghalaya.
“ Ka sorkar pdeng ka la dei beit ban pynkylla ïa kane ka Aiñ tih marpoh khyndew bad ka dei ban don da kawei ka rukom tih ym ban shu pynmadan beit ïa ki jaka ba don u mar poh khyndew khamtam u dewiong ha kane ka jylla” ong u ma Pala.
U la ong shuh shuh ba ka jylla Meghalaya ka donkam da kawei pat ka buit tih marpoh khyndew kat kum kane ka juk saian ba mynta. Kane ka jingtih ïa baroh uwei u lum ka long ka bym ïahap satia ha Meghalaya bad kan buh ïa ka jingeh kaba khraw ïa ka jylla. Kumta ka donkam ban pynkylla noh na ka rukom tih liew khnai sha ka rukom tih kum ka lynti ïaid napoh khyndew (tunnel).
U la ong na kata ka daw ba kane ka juh ka aiñ kan ym ïahap ban pyntreikam hapoh Meghalaya.
U la ong ka rukom tih dewiong kumba leh sha kiwei ki jylla ban khlong beit ïa baroh kawei ka jaka ba don u dewiong ka lah ban treikam lehse ha ki katto katne ki bynta ka ri lum Garo hynrei kan ym ïahap da lei lei ruh ha Khasi bad Jaintia Hills.
U ma Pala u la ong shuh shuh ba um pat iohi satia ia kata ka Mining Plan kaba la pynkhreh bad phah da ki katto katne ki trai par dewiong kumta um tip kaei kaba ki la thaw ban sdang ïa kata ka rukom tih dewiong kat kum ka juk stad saian mynta.
“ Lada ka ïing bishar Supreme Court ka la khang ïa ka jingtih dewiong liew khnai kumta kaei pat ka rukom tih dewiong ba ki la pynkhreh namar haduh mynta ym pat ïohi da kaei ka buit tih dewiong kin pyntreikam ha ka jylla” ong u ma Pala.
Ka shong beit ha ka sorkar pdeng ban pynkylla ïa ka aiñ tih mar poh khyndew khnang ba kan ïahap ruh hangne ha Meghalaya. “ Ngam tharai ba ka sorkar kan lah ban ai wai ban tih dewiong namar hangne ka don ka Ain khyndew ym kum ha kiwei kiwei ki jylla.
“ Kumta to ngin ïa ap shwa da kaei ka buit tih dewiong ha ka jylla kin pyntreikam namar ïa ka rukom tih liewkhnai la khang da ka ïing bishar SC. U dewiong hangne ha Meghalaya u don sha trai ha ka jingjylliew kaba 300-400 phut lane hapoh u maw shyiap ne u mawshun lane sha ka niamra kaba shatrai duh. Kumta ban leh da ka rukom tih dewiong kum sha kiwei ki jylla ban shu khlong beit baroh kawei ka jaka kam long da lei lei ruh hangne ha Meghalaya.Ngam tharai hi ruh ba kita kiba pan jingbit ban ïoh tih dewiong kin pyntreikam da kata ka buit tih kat kum ka juk stad satian namar hap ban bud bun tylli ki kyndon aiñ bad kam long kaba suk da lei lei ruh ban bud pyrkhing ïa ki lymda pynkylla shwa ïa ki aiñ kiba la don lypa” pynkut u ma Pala.
