ïasoi soskular ïasuk ka Sorkar Pdeng, Sorkar Assam bad ka ULFA, wan pyndem 8200 ngut ki dkhot

New Delhi Naohprah 29 : Ryngkat ka jingïadonlang u Myntri Kam Pohïing bad Myntri ka Tnat Cooperation jong ka Sorkar Pdeng, u Amit Shah, la ïasoi ïa ka Memorandum of Settlement ne ka soskular ïasuk hapdeng ka Sorkar India, Sorkar Assam bad ki dkhot jong United Liberation Front of Assam (ULFA), ha New Delhi, mynta ka sngi.
Ka jingïateh soskular ka long u mawmer ba kongsan ban pynurlong ïa ka thong jong u Myntri Rangbah duh, u Narendra Modi ïa ka thaiñ shatei lam mihngi kaba shongsuk shongsaiñ, kaba jop bad kaba lait na ki kam pyntriem bad ka roi ka par ha Assam.
U Myntri Rangbah jong ka jylla Assam, u Dr. Himanta Biswa Sarma bad ki heh ophisar jong ka Tnad Kam Pohïing jong ka Sorkar Pdeng bad Sorkar Assam ki la ïadon lang ha ka jingsoi ïa ka MoU.
Ha kane ka jingïalang, u Amit Shah u la ong ba mynta ka sngi ka dei ka sngi kaba kyrpang ïa ka Assam haba ka shongsuk shongsaiñ kan don ha ka thaiñ shatei lam mihngi bad ha Assam, kiba la mad ïa ka jingïaum snam la slem bha. U la ong hadien ba u Narendra Modi u la long u Myntri Rangbah duh ha u snem 2014, u la shim ïa ki sienjam ban jam ïa ki jingïapher hapdeng ka Delhi bad ka thaiñ shatei lam mihngi bad la sdang ïa ki jingïakren bad baroh. U Shah u la ong hapoh ka jingïalam jong u Myntri Rangbah duh u Modi, ka Tnad Kam Pohiing ka la trei na ka bynta ka thong ïa ka thaiñ shatei lam mihngi, kaba lait na ki kam pyntriem bad ki jingïaum snam. U la ong ba ha ki 5 snem ba la leit, la ïasoi 9 tylli ki jingïateh soskular ba ïadei bad ka shongsuk shongsaiñ bad u pud u sam bad ki jylla bapher bapher jong ka thaiñ shatei lam mihngi, kine ki la wanrah ïa ka shongsuk shongsaiñ ha bun ki bynta jong ka thaiñ shatei lam mihngi
U Myntri Kam Pohïing jong ka Sorkar Pdeng u la ong ba ki don palat 9000 ngut ki dkhot kiba la wan pyndem bad la weng ïa ka Armed Forces Special Powers Act (AFSPA) na 85 percent ka jaka ha Assam. U la ong namar kane ka Soskular kaba la ïasoi mynta ka sngi hapdeng ka Sorkar India, ka Sorkar Assam bad ka ULFA, ka Sorkar u Modi ka la kot sha ka jingjop ban weng ïa baroh ki kynhun pyntriem ha Assam. U la ong ba ka soskular kaba mynta ka sngi kadei kaba kongsan bha na ka bynta ka shongsuk shongsaiñ ha Assam bad ka thaiñ shatei lammihng baroh kawei. U la ong ba hapoh ka soskular kaba mynta ka sngi, ki dkhot jong ka ULFA ki la mynjur ban kyntait ïa ka lynti jong ka jingïaum snam, ban aiti baroh ki tiar ïaleh jong ki bad ki la pynsangeh noh ïa ki kynhun ïakhun jong ki. Nalor kane, ka ULFA ka la mynjur ruh ban weng noh baroh ki ktem ba sah ki dkhot jong ka, ban ïashim bynta ha ka synshar paidbah kaba don nongrim ha ka ain bad ban ïada ïa ka jingtylli jong ka ri.
U Amit Shah u la ong ba ha ka jingïakhun bad ka ULFA, kumba 10 hajar ngut ki briew na baroh arliang ki la duh ïa la ka jingim, kiba dei ki nongshong shnong jong kane ka ri, hynrei mynta ka sngi la lah ban pynbeit shisyndon ïa kane ka jingeh. U la ong ba ka Sorkar India ka la mynjur ban ai jingïarap bad shibun ki projek na ka bynta ka roi ka par jong ka jylla Assam.
U la ong ba ka sorkar u Modi kan bud baroh ki kyndon jong ka jingïateh soskular. U Shah u la ong ba hadien ba la wan ka sorkar u Modi ha u snem 2014 ki jingjia ïaumsnam ha Assam ki la duna da 87%, ki jingiap da 90% bad ki jingjia shah rahbor da 84%. U la ong haduh mynta 7500 ngut ki dkhot ki la wan pyndem tang ha Assam, ka ban don shuh shuh sa 750 ngut mynta ka sngi, kumta ka jingwan pyndem jong palat 8200 ngut ki dkhot tang ha Assam ka dei ka jingsdang jong ka juk ba thymmai jong ka shongsuk shongsaiñ.
U Myntri Kam Pohïing jong ka Sorkar Pdeng u la ong ba ka sorkar Modi ka la ïasoi ïa ka jingïateh soskular bad ka NLFT ha u snem 2019, Bru bad Bodo ha u snem 2020, Karbi ha u snem 2021, ka soskular bad ki Adivasi ha u snem 2022, ka soskular ba ïadei bad u pud u sam hapdeng ka Assam- Meghalaya, ka soskular ba iadei bad u pud u sam hapdeng ka Assam- Arunachal Pradesh bad ka soskular bad ka UNLF ha u 2023 bad mynta ka sngi bad ka ULFA.
U la ong ba lyngba kane ka jingïateh soskular kaba mynta ka sngi, ka la sdang ka por ba thymmai jong ka shongsuk shongsaiñ na ka bynta ka thaiñ shatei lam mihngi khamtam ka jylla Assam.
U Amit Shah u la ong ba ka Tnad Kam Pohïing, Sorkar India kaba la buh da ka por ban pynurlong ïa ki jingdawa jong ka ULFA bad yn thung ruh ïa ka committee na ka bynta ka jingpeitngor ïa ka. U la ong ba ha baroh ki jingïateh soskular ba la ïasoi hadien u snem 2019, ka sorkar u Modi ka la trei borbah bad la shim ïa ki sienjam ban pynurlong ïa baroh ki kyndon.
U Myntri Kam Pohïing u la ong ba kane kan nym urlong khlem ka jingïohi jngai jong u Myntri Rangbah duh u Modi ïa ka thaiñ shatei lam mihngi kaba lait na ki kam pyntriem.