Khot bad wer ka KCCM ïaki paid riewngeit sha ka 41st Annual Christmas bad Annual Meet ki Karbi

Nongpoh, Nohprah 29: Ka Karbi Catholic Community of Meghalaya (KCCM), ka khot bad wer ïa baroh ki paid riewngeit jong ka Balang Catholic Karbi jong ki 4 tylli ki Parish ba kynthup ïaka Parish Umden, Parish Nongpoh, Parish Byrnihat bad Parish Mawbri ban wan shim bynta sha ka 41st Annual Christmas Karbi bad ka Annual Meet 2023 ka ban long haka 30 bad 31 tarik mynta u bnai ha Balang St. Joseph Catholic Church, Belkuri kaba hap ha Lumsinai Parish Umden ha Ri-Bhoi District.
Haba phah ïaka kyrwoh naka liang u Bah Keson Klein President ka KCCM u la ïathuh ba haka sngi sdang kan don ka jingïakop rwai naki balang bapher bapher ka ban sdang naduh ka por 1 baje nohphai sngi bad u nongkren ha kane ka janmiet un long u Rev. Fr. Anthony Ingty Assistant Parish Priest jong ka Diphu Parish, Karbi Anglong Assam.
Ha ka sngi kaba bud kaba dei ruh ka Sngi u Blei, u Most Rev Paul Mattekat, Bishop jong ka Diphu Diocese, Karbi Anglong Assam, un sa long u nongkñia rangbah ha ka Mass Bakhuid ha ryngkat bad u Rev Fr. Michael Khongngain, Parish Priest Umden Parish bad kiwei ki phadar kiba la khot sngewbha.
Kumta naka liang ka KCCM ka khot bad wer ïa baroh ki paid riewngeit ka Balang Catholic naki jaitbynriew Karbi ba kin wan sha katei ka jingïakynduhlang kum ka jingleh kmen khristmas bad snem thymmai.