Shillong, Nohprah 29 : Ka Dorbar Shnong Mawlai Mawtawar ka la lah ban pynneh pynsah ïa kawei ka jaka kaba don ïa ki maw donnam kiba la buh naduh ka por ki mynbarim.
Ïa kane ka jaka kaba dei jong ka Kur Kharkongor la ai sngewbha sha ka Dorbar Shnong ban pynneh ïa ki maw donnam, ïa kiba la ïathuh ba kidei ki nongker nongda jong ka shnong ha ki por kulong kuma.
Katkum ki khana pateng na ki menbarim ïa katei ka jaka kaba don ha ka kyntoit Lummawtnum, jong ka Mawtawar la ong ba udei u ïing shong jong ki Blei, ha kaba ki menbarim ki niew kyntang ïa utei u Lummawtnum.
Halor une u lum don lai tylli ki maw ba la tip da u Mawtnum, Mawblang bad u Mawkhong-oi, ïa kiba la ngeit ba ki dei ki ‘lei muluk ‘lei jaka kiba dei shipara bad kiba ker ba da ïa ka shnong ka thaw.
Ban pynneh pynsah ïa kitei ki maw donnam, bad ban pynlong ïa utei u lum kum kawei na ki jaka jngohkai ba ithiang, na ka liang jong ka shnong ka la ïoh ïa ka jingïarap na ka KHADC ban pynitynnat ïa katei ka jaka.
La shna ruh ba kan long kum kawei na ki jaka jngohkai ba itynnat, ïa kaba la jer kyrteng da ka ‘Mawkhongngoid park cum view point’,.
Na jrong jong utei u lum lah ban ïohi kyndiang ïa ka pung Umïam, bad ïa u Lum Sohpetbneng bad wat ïa ki Lum Makashang ne Lum Himalaya ha ka por ba shai bha ka suiñ bneng.
Lah ruh ban ïohi ïa kiwei ki jaka donnam ka ri Khasi kum ïa u Lum Shyllong, Lumsymper bad ïa ka Sor Shillong kumjuh ïa kiwei ki jaka kiba tawïar pyllun ïa utei u lum.
Ïa kane ka jaka la lah ban plie paidbah hynne ka sngi ka 29 tarik Nohprah da u MDC ka Mawlai, u Bah Teiborlang Pathaw ha ka jingïadon lang ki nongïalam shnong, u Bah C Kharkongor, u Secretary shong, u Bah KS Nongdhar uba la pynsngew ïa ka khana lyngkot jong utei u Lum bad kumjuh ki trai jaka kiba dei na ka Kur Kharkongor.
Na ka liang u MDC ka thaiñ ba dei ruh u Executive Member ka KHADC, Bah Teibor Pathaw u la ong ba ka Mawlai constituency ka la heh bha bad kumta ka eh bha tang na ka skim MDC ban peit lut nadong shadong hynrei la kattta ruh u pyrshang kat ha la i bor ban kner lang lada ki nongïalam ki mih shakhmat ban ïatrei ryngkat ryngkat.
“Nga ïaroh ïa ka bor shnong kiba la ïohi jngai ban pynneh pynsah ïa une u maw da kaba phaikhmat lang shanga kum u nongmihkhmat ban pyntyllun ïa kane ka kam haduh ba kan long kumba ka long mynta. Nga khot nga wer ïa ki paidbah ba kin wan sha kane ka jaka ban peit ïa ka jingitynnad bad ka jingithiang ki sawdong sawkun jong ka bad phin sa hun jrut,” ong u Bah Teibor haba kren ha ka jingïalang.
Shuh shuh u ong ruh ba ki paidbah ki dei ban shim ïa kane ka kabu ksiar ha kum kane ka por Tlang khamtam ha ka por ba shai bha ka bneng lah ban ïohi kyndiang ïa ki lum Makashang lane ki lum Himalaya najrong katei ka jaka jngohkai.
“Kan sa don ka por ba na kane ka jaka dang step ki briew kin sa wan hangne ban peit ïa ki lum Makashang kiba lah ban ïohi tang ha ka por Tlang,” u la bynrap shuh shuh.
