Da ki phew hajar tuid ki paidbah sha shnong Moolamylliang EJHD, ka shnong ba pynthaba ding da ki rong ba itynnad

Khliehriat, Nohprah 29: Da ki phew hajar ngut ki paidbah ki leit ban jngoh kai ïa ka shnong Moolamylliang kaba don ha East Jaiñtia Hills District, ka shnong kaba la paw bha kum kawei na ki shnong kiba khuid tam, kawei kaba khring bha ïa ki paidbah ka dei ba ki paidbah ki leit ban jngoh bad sakhi ïa ki jingpynthaba ding da ki rong bapher bapher ha baroh kawei ka shnong, ïa kane ka jingpynthaba ding la plie naduh ka 18 tarik u nohprhah 2023 bad yn pynkut haduh ka 3 tarik u kyllalyngkot 2024.
U Waheh Shnong jong ka shnong Moolamylliang, u bah Apmon Pashiang, u la iathuh ba kumba ar hajar ngut shi sngi ka jingwan poi ki briew hapoh shnong bad la khmih lynti ruh ba ka jingpoi ki paidbah kan nang kiew ha kine ki sngi, kiba wan na ki shnong bapher bapher, kiba na jan bad kiba na jngai, kane ka shnong Moolamylliang, East Jaiñtia Hills District ka jngai 112 kilo mitar na ka nongbah Shillong bad 15 kilo mitar na ka District headquarter, Khliehriat.
Na ka liang ka Dorbar Shnong ka la pynkhreh ruh ïa ki jaka sah ha ki hotel bad ki gust house kiba don hapoh ka district na ka bynta kita kiba wan na ki jaka ba jngai.
Ka jingpynthaba ding ha ki rong bapher bapher ha baroh kawei ka shnong ka long kum shi bynta ban pdiang ïa ka jinglehkmen krismas bad jingleh kmen snem thymmai, ha kajuh ka por ka Doarbar Shnong ka pynkhreh ruh ïa ki nong rwai bad nongtem bapher bapher bad la sakhi ba ki paidbah ki la tuid sha kane ka shnong bad pynbyrngia bad leh kmen ha ki sur jingrwai ba la rwai da ki nongrwai bapher bapher kiba tem ha ka Chrismas Concert.
Kum ban shu phai dien, kane ka shnong ka la ïoh ruh ban khur bun tylli ki khunsam kum kawei na ki shnong ba khuid bad ruh ka shnong kaba lah ban pynneh pynsah ïa ka mariang kaba kup rong jyrngam, ka jinglah ban kynjoh shaduh kane ka nam ka burom ka dei ruh namar ka jingiatreilang ka Dorbar shnong lem bad ki paidbah nongshong shnong kiba ieid ïa ka khuid ka suba bad kiba ieid ia ka mariang.