Shillong, Nohprah 29 : Ka Khasi Students Union (KSU)-Laban Circle kala leit khynra ia kawei ka Shelter Home kaba don ha Kenches Trace (Harrison Bridge), kaba la kylla kum ka ktem ïadih droks bad kam awria bad kynthei bad shynrang.
Kane ka jingkhynra ka KSU ka la jia hynnin ka janmiet sngi Palei, hadien ka jingsaphriang jong ka video ha ki rynsan social media, kaba pyni ïa katto katne ngut ki samla kynthei bad shynrang kiba dang ïa injek droks ha kane ka Shelter Home.
Kat kum ka jingong ka KSU, kane ka Shelter Home ka dei kaba la shu ïeh lyngkrang da ka Shillong Municipal Board (SMB) haduh ba ka la kylla long ka ktem dih drok bad leh kam awria.
Ka KSU Laban Circle ha ka jingsynran ki Pulit ka Laban Police Station, ka la khynra naphang ïa kane ka Shelter Home bad ïoh kurup ïa ki tiar injek bad ki tyndong plastic ba ju buh droks.
Hynrei ha kane ka jingkhynra, ym shym la lapdien satia ïa ki briew. Ka KSU ka pyntip ba ka la ïoh jingtip ïa ka kyrteng jong kine ki kynthei bad shynrang kiba ïa injek droks bad ïa kine ki kyrteng la aiti sha ki Pulit ba kin leh iïa kaba donkam.
Ka KSU-Laban Circle kala pyntip ba kan sa leit buh da ka dorkhas ha u Chief Executive Officer (CEO) ka Shillong Municipal Board (SMB) ban dawa ban buh noh da ki bor pahara ha kane ka jaka nalor ban kyndang noh ïa kine ki briew kiba pynlong ktem sniew ïa ka`ne ka jaka.
