Ring tyrkhong palat 792 ki umpohliew ha kylleng ki bynta ka jylla, pyntip u CM ha Ïing Dorbar

Shillong, Lber 03 : Ka sorkar jylla ka la pynïaid shakhmat ïa ka kam na ka bynta ban pynkhie im biang ïa kumba 792 tylli ki umpohliew ne ki tyllong um (springshed) kiba don ha ka jylla kiba la don mynta ha ka jingma na ki 70,000 tylli ki tyllong um ha kaba 55,000 tylli kidei kiba la dep ban lum jingkhein.
Ïa kane la pyntip da u Myntri Rangbah ka Jylla, Conrad K. Sangma, haba jubab ïa ka jingkylli ba la wanrah da u MLA ka VPP na Mawryngkneng, Bah Heavingstone Kharpran hapoh ka Ïing Dorbar Thawaiñ ka jylla ha ka sngi Nyngkong.
U Myntri Rangbah u la pyntip ruh ba ka jylla ka la mang ban pynlut palat 4,000 klur tyngka na ka bynta ban pynïaid shakhmat ïa ki kam kiba ïadei na ka bynta ban pynneh pynsah ïa ki tyllong um.
Katkum ka jingong jong u Myntri Rangbah, “Ki la don kumba 70,000 tylli ki jaka lang um haduh mynta, ha kaba 55,000 tylli la dep ban wad bniah bad ka jingpynkhie im ïa kine ka la ïaid shakhmat.”
La ong ruh ba hadien ka jingpeit bniah ki la lap ba haduh 792 tylli na ki 55,000 tylli ki tyllong um ba la jurip ki la don jingma bha, kaba mut ba ka um ka la tyrkhong lut. “Kine ki tyllong um ki ai um sha ki projek kiba long shibynta jong ka Jal Jeevan Mission (JJM). Kumta, la pynwandur ïa ka projek kaba shongdor 32 klur lyngba ka tnad Soil and Water Conservation, bad ki don 67 tylli ki tyllong um kiba yn sa pynkhie im bïang da kaba pyrshang lut ki lad ki lynti ban pynkhie im biang ïa kine ki jaka ba ju don ki tyllong um,” u la bynrap biang.
Katkum ka jingong jong u, la shna haduh 1601 tylli ki tyllong um lyngba ka skim 100 sngi lane ka Mahatma Gandhi National Employment Guarantee Scheme (MGNREGS) ha kine ki san snem ba la dep ha ka jinglut kaba 46.62 klur.
La ïathuh ruh ba kine ki 1601 kidei ki khana jingjop kiba ki paidbah dalade ki la lah ban leh bad mynta na ka liang ka shnong, ki paidbah bad ki Village Employment Council ki la peitngor bad sumar ïa kine kiba la dep ban leh. U ong ruh ba ki paidbah mynta ki la sngewthuh bad shimkhia ban sumar ïa kine ki tyllong um bad ka kam ka dang ïaid shakhmat.
Da kaba pyndonkam ïa ki kor ki bor kiba mynta, u la ong, “Mynta ngi lah ban peitngor ïa ka jingdon ka um ha ki tyllong um bad ki don ruh haduh 13,000 ngut ki nongtrei mon sngewbha (VCFs) kiba la hikai ban peit bniah ïa ki bad ruh ban ai jingtip biang khnang ba ngin lah ban shim ïa ki sienjam kiba biang (kynthup ïa ki jingsumar kiba bun na ka bynta ban pynkhie im ïa ki tyllong um).”
U Myntri Rangbah u la ong ruh ba yn tei haduh 532 tylli ki jingtei kum shi bynta jong ka projek kaba 62 million dollar ba la bei pisa da ka Asian Development Bank (ADB) ban pynim biang ïa kine ki umpohliew.
U la bynrap, “Ngi la nang pynbun ïa ka jingpynlut jong ngi bad pynthikna ba 30 persen na ki kam ha ka MNREGS ki dei ban long kiba ïadei bad ka um. Ka long kaba kongsan bha kum ka sorkar ban peit ïa ka um kum kawei na ki mat ba hakhmat eh bad kumta namar ngi don ïa ka Climate Council kaba la khlieh da u Myntri Rangbah bad baroh ki tnad kiba ïadei bad ka um ki dang ïatai lang ha ka sien kaba nyngkong na ka bynta ban pynkhie im biang ïa ki tyllong um ba don ha ka jylla.”
Halor ka jingkylli ba wanrah da u MLA ka VPP na Nongkrem Bah Ardent Miller Basaïawmoit la ka projek Shillong Ropeway kan ktah neem ïa ki tyllong um ha ka thain, na ka liang u Myntri Rangbah u la ong, “Ka tnad Forest nangta ka tnad Soil and Water Conservation bad ki agency bapher bapher ki la dep ban wad bniah ha kaba yn pynieng païa ban pyntikna ba ngin ym pynthut ïa ki tyllong um bad ruh ïa ki jaka khlaw. Kumta ïa kane la dep ban peit bniah lut ha baroh ki kyrdan.”
Shuh shuh u ong ruh ba halor kane ka jingeh la dep ruh ban peit bniah bha bad na ka tnad Khlaw ruh ka la banjur ïa ka jingdonkam ban don ka lynti ïaid jong ka bording khnang ban khanglad ïa ka jingpluh khlaw kaba lah ban jia bad ruh ban pynduna ïa ka jingpynkhyllem bun ïa ki dieng.