Rem noh ka Meghalaya ha ka phainal, jong ka Santosh Trophy

Shillong, Lber 05 : Ka Meghalaya ka la rem noh ha ka jingïalehkai phainal jong ka Santosh Trophy (76th National Football Championships) da 2-3 kol ha ka Karnataka kaba la ïoh rah ïa ka nam lahduh ha ka jingïalehkai phainal kaba ïakhaid bha ha ka miet sngi Saitjaiñ ha King Fahd International Stadium.
Ka Karnataka kaba kynthup lang ki player pynap (reserve) jong ka Bengaluru FC bad ki katto katne ki player donsap na ka Bengaluru District Football Association kaba ïalehkai Super Division League ka la thaw history da kaba jop nam lahduh ha ka sien kaba nyngkong ha ka Santosh Trophy kaba la pynïalehkai shabar na la ka jong ka ri.
Ka sien kaba khatduh ba ka Karnataka ka la khur nam lahduh sien ba saw kadei ha Mysore kata ha u 1968-69 ha Banglore bad naduh katei ka samoi ka la poi phainal tang ha u 1974-75, ha kaba ka la mad nam rem noh.
Hynrei katei ka kynhun ba la ïalam da u Ravi Babu Raju kum u head coach ka la lah ban ïalehkai bha ha kane ka samoi da kaba lah ban pynurlong ïa ka jingphohsniew hadien ba ka la pynliem noh ïa ka Meghalaya bad rah ïa ka nam lahduh kaban sah jingkynmaw shirta.
Haba phai sha ka jingïalehkai phainal ha kane ka lympung ha ka miet sngi Saitjaiñ ka la long ka jingïalehkai kaba itynnad bad ïakhaid bha, ka Karnataka ka la plie pyrda nyngkong ïa ka shi kol ha ka jingïalehkai ba dang ïaid 2 minit lyngba u M Sunil Kumar.
Ka jingïakhun ka la nang itynnad shuh shuh dei hadien ba ka Meghalaya ka la ïoh ban pynphai kylla lyngba u Brolington Warlarpih uba la thep ïa ka kol pynïakhaid ha ka minit ïalehkai kaba 7. Lyngba katei ka jingïakhaid, baroh arliang ki la ïakhun tyngeh ban ïoh thep kol.
Katba ki minit ïalehkai ki dang ïaid, ka jingïalehkai ka la nang stet ha baorh arliang kiba la ïoh katto katne ki kabu ban thep kol, bad dei ha ka minit ïalehkai kaba la ïaid 10 minit, ka Karnataka ka la ïoh biang ban pynkhih ïa ka jar ba la thep da u Bekey Oram. Ki rangïalehkai ka Meghalaya watla ka kynhun ka la shah thep tam kol pynban kim shym la duh mynsiem bad ïakhun beit triang hynrei ki katto katne ki kabu ki la pynlehnoh ei. Ha ka jingïalehkai kaba la jan poi sha kaba kut jong ka kylla step u Robin Yadav (44 min) u la thep ïa ka kol kaba lai na ka bynta ka Karnataka kaba la lah ban lamkhmat da 3-1 kol ha kaba kut jong ka kylla step.
Haba wanphai sha ka jingïalehkai jong ka kylla miet, ka jingïakhun ka la nang ïathnem ha baroh arliang, ka Karnataka ka la ïalehkai ban khanglad sha kaba bynta ba shadien bad khlem da ailad ïa ka Meghalaya ban tur sha ka kut jong ka.
Hapdeng ka jingïalehkai kaba ïakhaid bha, ka Meghalaya ka la ïoh ban pynhiar mynsiem hadien ba u Sheen Stevenson u la thep ïa ka kol kaba ar na ka bynta ka kynhun ha ka minit ïalehkai ba 60.
Katei ka shi kol ba ka Meghalaya ka la ïoh ban thep ha katei ka minit ka la pynsmiej ïa ki rangïalehkai jong ka Karnataka, hynrei namar ba ka por ka la lyngkot na ka liang ki rangïalehkai ka Meghalaya kim ïoh shuh ban thep kol ha kaba ka Karnataka ka la lah ban pynliem syndon da 3-2 kol bad ïoh rah ïa ka nam lahduh.
Ha kaba kut jong ka jingïalehkai, la sam ïa ka trophy kumjuh ruh ki khusnam shimet ba kynthup ka khusnam Best Goalkeeper ba la ïoh da u Rajat Paul Lyngdoh (Meghalaya) uba la ïoh ban pynlait 6 sien na ka jingshah thep kol ha ki 12 sien ïalehkai katba u Robin Yadav (Karnataka), uba ïoh thep hynriew kol kynthup ha katei ka jingïakhun phainal u ïoh ka khusnam Player of the Championship.