Shillong, Risaw 18: Ka kynhun ki rangïalehkai ka Meghalaya’s U-19 ka la mad ïa ka namrem hynñiew wicket pyrshah ïa ka Delhi ha ka jingïakhun jong ka lympung Vinoo Mankad Trophy match in Vijayawada kaba la long hynne ka Sngi Balang.
Hadien ba jop ïa ka toss u Avinash Rai kapten jong ka Meghalaya u la jied ïa ka kynhun ban tied nyngkong. Ha ka batting, na ka liang jong u Lensbirth N Marak (17 ron) bad u Kshitij Singhania made (11 ron) u ba la mih ha ka pali ba lai ki la lah ban kyntiew ïa ka ron na bynta ka kynhun, hynrei ka jingïoh kamai ron ka la sdang ban hiar ïa ka Meghalaya, ha kaba na ka 39/2 baroh ki wicket ki la shah pynhap bad kynjoh tang 76 ron naki 33.4 over, hadien ba ki nongtied kiba la mih hadien kim shym la lah ban ai jubab ïa ki nongkawangbol ka Delhi.
Ha ka inning kaba ar (pali tied jong ka Delhi), ka Meghalaya ka la sdang da kaba seisoh, hadien ba u Shavian Blah u la ïoh ban khur wicket lyngba ka jingïarap na u Da-u-la-biang Shangpliang u ba la ïoh bat ïa ka bol kaba hap na suiñ (catch-out) tang mar ïa sdang bowling. Hadien kane, ha ka over kaba bud, u Bilgrak G Sangma u la ïoh ban pynhap sa u wei u player tied lyngba ka jingïarap jong u Shubham Rasaily (catch-out) kaba la pynlong ïa ka Delhi ban shah pynhiar da 7 ron bad 2 wicket.
Hynrei watla kata ruh, ki rangïalehkai ka Delhi ki la lah ban wanphai tyngeh ban pyndep kynjoh ïa ka ron ba la buh tang hapoh 7.2 over.
U Shavian u la ïoh ban khur biang sa shi wicket hadien, hynrei ki player ka Delhi ki la ïohlad ban kamai katto katne ron na ki bol kiba u kawang, kiba kynthup ïa u Tarun Bisht (42 not out naki 16 bol) bad u la pyndep ïa ka inning da kaba khur 2/49 na ki 4 over. Katba u Bilgrak, u la pyndep da 1/25 naki 3 over.
Ka jingïakhun ka ban wan ïa ka Meghalaya kan long pyrshah ïa ka Maharashtra lashai ka sngi Thohdieng.
Na ka liang jong ka kynhun lehkai kriket jong kiba la rangbah ka jylla, kin sa hap ban aireng pyrshah ïa ka Mizoram ha ka lympung ïakhun jong ka Syed Mushtaq Ali Trophy T20 tournament mynta ka sngi ha Jaipur, katba ka kynhun kynthei kiba heh (women semior) kin sdang aireng nyngkong ha ka lympung Senior Women’s T20 Trophy ha Vadodara mynta ka sngi pyrshah ïa ka Pondicherry.
