3rd DIVISION Football League 2023: Jop ka Lawmali Pyllun SC & Gorkha Association, ïakhaid kawei ka jingïakhun
Shillong, Risaw 18: Ki lai tylli ki jingïakhun jong ka lympung SSA SRGT 3rd DIVISION Football League 2023 kaba la long hynne ka Sngi Balang (18 Risaw 2023) ha madan 1st Ground SSA Stadium.
Haba phai sha ka jingïalehkai kaba nyngkong ha ka por 11 baje mynstep ha 1st Ground SSA Stadium, ka Nongumlong SC ka la ïakhaid bad ka Lumdiengjri SC hadien ba baroh ar kynhun ki la ïoh ban thep mar 2 kol.
Haba bishar ïa ka jingïalehkai hapdeng kine ki ar kynhun ka la long kaba itynnat bad ka jingïathep kol ka la wan markylliang kawei hadien kawei. Dei ka Lumdiengjri SC kaba la ïoh ban plie pyrda ïa ka kol kaba nyngkong na u Gabriel Blah ha ka minit kaba 26 hynrei u Donbor N Shanpru u la ïoh ban pynïakhaid na bynta ka Nongumlong SC ha ka 38 minit.
Ha ka kylla kaba ar, sa ka Nongumlong SC kaba la ïoh ban lamkhmat ïa ka jingïakhun lyngba ka kol na u Nehlang Kharsahnoh ha ka 66 minit hynrei tang hadien katto katne por ka Lumdiengjri SC ka la lah ban pynïakhaid lyngba u Borsing Langñuih ha ka 69 minit bad haduh kaba kut ym shym la don ba lah ban pynïakhlad ïa kine ki ar kynhun.
Haba phai pat sha ka jingïakhun kaba la sdang ha ka por 1 baje mynsngi ha SSA Stadium, ka Lawmali Pyllun SC ka la khur namjop hadien ba pynliem da 3 – 2 kol ïa ka Rynjah SC.
ïa kine ki lai kol na bynta ka Lawmali Pyllun SC la thep da u Lahnambhah Manner (25 minit), nangta na u Nathaniel Kharbuli (37 minit) bad khadduh na u Banganson Nongphlang (44 minit). Katba ki ar kol na ka Rynjah SC la thep da u Banshailang khriem (73 minit) bad na u Hasken Roy Kharsati (78 minit).
Ha ka jingïakhun kaba khadduh ha por 3 baje nohphaisngi, ha 1st Ground SSA Stadium ka Lapalang SC ka la mad namrem da 1-2 kol ha ka Gorkha Association.
Ka shi kol na ka Lapalang SC la thep da u Ryntih Marap ha ka 80 minit, hynrei ka namtam ka long sha u Gabriel iacias u ba la thep baroh ar kol (14 min & 66 min) na bynta ka Gorkha Association.
Ki jingïakhun mynta ka sngi ki long ; ka jingïalehkai kaba nyngkong kan sdang ha ka por 11 baje mynstep ha 1st Ground SSA Stadium hapdeng ka MLP FT pyrshah ïa ka Krang SC, bud sa ka jingïakhun kaba ar ha ka por 1 baje mynsngi ha SSA Stadium, hapdeng ka Nongmynsong SC pyrshah ïa ka Umlyngka SC. Ka jingïakhun kaba khadduh kan long ha ka por 3 baje nohphaisngi ha 1st Ground SSA Stadium hapdeng ka Nongkseh SC pyrshah ïa ka Pomlakrai SC.