Shillong, Risaw 18: Ka Meghalaya Motorsports Society (MMS) kaba dei ka synjuk ba thymmai, hynne ka Sngi Balang ka la wan shakhmat ban pynbna halor ka jingpynlong ïa ka lympung ïakop pyni-sap ñiah ar-shaka kaba la tip da ka ‘Drift Show’ ka ban sdang ha ka 20 tarik Risaw, 2023, kata lashai ka sngi.
Ha kane ka jingïalang ban pynshai halor kane ka rynsan ïakop pyni-sap ñiah ar shaka la don ryngkatlang da ka Chairperson jong ka Meghalaya Motorsports Society bad ruh u Sanam Sekhon, u ba bat ïa ka nam ‘Drift King of India’, u ba la shah khot sngewbha ban kyntiew ïa kane ka rynsan ïakop pyni-sap ha nongbah Shillong.
Haba ai jingkren sha ki lad pathai khubor hynne ka sngi, na ka liang jong ka Phoebe Nongrum, ka la pynpaw ba kane ka dei ka sien ba nyngkong ban pynlong ïa ka ‘Drift Show’ ha Shillong. Ka thong ba hakhmat eh jong ka kynhun ka long ban kyrshan bad plielad ïa ki samla kiba ju sngewtynnat ban shimbynta ha ki rynsan pyni-sap ñiah ar-shaka (kiba kynthup naduh ka ñiah saikil) bad ruh ban kyntiew shuh shuh ïa ka sap kaba ki don.
Shuh shuh, ka la pynpaw ruh ba na ka liang jong ka synjuk ka kwah ban pynsaphriang ïa ka khubor ba ka ‘Drifting’ ka dei kawei na ki sap jong ka Motorsports bad na bynta ki samla kiba don ïa ka sap kane ka lah ban kylla long ka lad kamai ïa ki.
ïa kane ka rynsan ïakop pyni-sap ñiah arshaka la pynkhreh ban pynlong ha I.S.B.T Mawiong naduh ka 20 tarik bad 21 tarik u Risaw, 2023, ha kaba ka event ki kynthup ïa ka jingïakop pyni-sap ha ka thuk thuk, skateboard bad ka scooter stunt.
