K i nonghikai skul kiba la aiti ïalade met bad mynsiem ban pynnang pynstad ïa ki nongshong shnong ha ka jylla ynda ki la shongthait na ka kam hikai skul ki la mad pynban ïa ka jingim kaba syrtok bad mad ruh bun ki jingeh ha ka jingim kaba manla ka sngi namarba ka Sorkar ka leh matlah bad kam patiaw eiei ruh em ïa ki jingeh ba ki nonghikai skul ki ïakynduh ynda ki la shongthait na ka kam.
Ka long ka jingdawa kaba shongnia bad kaba shongaiñ ba ki nonghikai skul ki dei ban ïoh ka baibam tymmen ne ka pension ynda ki la tymmen bad ki la shongthait na ka kam kaba ki shakri. Ka lawei jong ka ri ka shong ha ka kti jong ki nonghikai skul. Ka jingkiew irat jong ka ri ki dei ki matti jong ki nonghikai skul. Ym lah ban len, ki nonghikai ki dei ki nongsaiñdur ïa ka lawei jong ki khynnah skul bad ka jingkiew irat jong ka pule ka puthi ha kane ka jylla Meghalaya ka dei hi ka jingaiti met bad mynsiem jong ki nonghikai skul.
Ka long kaei kaei kaba i lehraiñ hi khait ba ka Sorkar kam kheiñ snep ïa ki nonghikai watla ki long ki nongtei ïa ka lawei jong ki khynnah skul bad kam kheiñ kor ïa u synñiang u bynhei ba ki nonghikai ki la noh sha u sup u thiar ban kyntiew ïa ka pule ka puthi ha ka jylla.
Ka sorkar ka kham kheiñkor ïa ki politishian bad ïa ki nongtrei jong ki seng saiñpyrthei kiba long kum ki thliem khlem khmat namarba ka pynlut pisa da ki klur ban siew tulop ïa ki manla u bnai. Ka Sorkar ka thungkam ïa ki MLA bad ïa ki MDC kiba u paidbah u la kyntait ha ka elekshon namarba ka sngewsynei ba kim ïohkam ïohjam. Phewse, ïa ki nonghikai kiba trei minot bad kiba aiti lut met bad mynsiem na ka bynta ban saiñdur ïa ka lawei jong ki khynnah skul ka Sorkar kam pushe wat tang khyndiat ruh.
Kaba kham sangsot ka long ba ki don ki nonghikai skul kiba wan na ki iing ki sem kiba kham duna ka ïoh ka kot ki ïakynduh mawsiang haduh katta katta haba ki mad ïa ka jingpang jingshitom kaba kham eh ban pynkoit. Kum kine ki jingjia, ki pynduh mynsiem haduh katta katta bad ka long kumba theh umpjah ïa ka jingshakri jong ki nonghikai skul da ki phew phew snem.
Ki jingai burom jong ka Sorkar ïa ki nonghikai shisien shisnem kam don jingmut eiei lada ka Sorkar kam ïohi ïa ka jingeh kaba ki nonghikai skul ki ïakynduh nalor ba ki ïoh tulop shisien lai bnai.
Ka jingïakhun jong ki nonghikai skul Deficit kiba la shongthait kiba don hapoh ka shatri jong ka Meghalaya Retired Deficit School Teachers Association ban ïoh ïa ka baibam tymmen ka dei kaba shongnia. Ki seng saiñpyrthei ki nang ban tang khleiñ ha ka por elekshon ban pynurlong lut ïa ki jubanlak ba ki la khlei hynrei ynda ki la ïoh thaw Sorkar ki leh klet lut ïa ki jingkular bad ki pynsyrtok haduh ban da suwan ïa ki paidbah.
Katkum ka jingïathuh jong u President ka Meghalaya Retired Deficit School Teachers Association u Bah ED Nongsiang tang ki nonghikai skul deficit kiba la shongthait hapoh ka jylla Meghalaya ki don don kumba 2000 ngut. Lada kheiñ sa ïa kiwei kiwei ki nonghikai ka nombar kan nang kiew arshah khlem da kynthup lang ïa ki nonghikai skul Sorkar bad ïa kiba hikai ha ki skul Private.
Haduh sanphew snem ban ïakhun ïa la ka jong ka hok ka long kaei kaei kaba sngewsangsot haduh katta katta ïa ki nonghikai.
Nalor kata, kaba kham sangsot ka long ban iohi ïa ki nonghikai kiba hap ban mih sha surok na ka por sha ka por ban dawa ïa la ka jong ka tulop na ka daw ba ka Sorkar ka pynslem ban siew ïa ka bainong kaba ki ladep trei. Kane ruh ka dei sa kawei ka jingeh kaba ki nonghikai ki ïakynduh mawsiang.
