Rem biang ka Lajong ha ka jingïalehkai lympung Super Cup

Shillong, Kyllalyngkot 20: Ka kynhun ïalehkai jong ka Shillong Lajong FC sa shi sien pat ka la mad ïa ka namrem ha ka lympung Kalinga Super Cup ha ka thup ïakhun jong ka Group stage.
Ha kane ka kynti, ka kynhun ka la shah pynliem da 2-0 kol ha ka Jamshedpur FC, kaba dei artad ka jingïakhun kaba khadduh na ka Group jong ka Lajong ha kane ka lympung Kalinga Super Cup kaba la long hynne ka Sngi ha Kalinga Stadium, Pitch 1, Bhubaneswar.
Haba phai sha ka jingïalehkai, ka jingïakhun ka la ïakhaid tad ynda la jam sha ka 45 minit, hadien ba ka Jamshedpur ka la ïoh ban tam lyngba ka kol na u Mohammed Sanan, kaba la pynlong ïa ka Jamshedpur ban lamkhmat haba kut jong ka kylla step.
Haba jam sha ka jingïakhun jong ka kylla kaba ar, ka Jamshedpur ka la ïoh ïa ka kabu na ka penalty ha ka 52 minit ban thep ïa ka kol kaba ar, hynrei kam shym la lah ban pynurlong hadien ba u Seminglen Doungel u khlem shym la lah ban pynrung ïa ka bol shapoh kol.
Hynrei watla kata ruh, ka Jamshedpur ka la pynthikna khur jingjop lyngba ka kol kaba ar kaba la wan ha ka 73 minit lyngba u Thongkhosem Haokip ban khur ïa ki lai point.
Da kane ka namrem, ka Lajong kan hap ban pynjanai ïalade na bynta ka lympung I-League, ka ban sa bteng biang ha ka 3 tarik jong u Rymphang, ha kaba kan sa ïakhun pyrshah ïa ka Inter Kashi hala ïing, ha madan SSA Stadium, Shillong, Polo.