Tura, Kyllalyngkot 20: Ki thei ïalehkai jong ka South West Khasi Hills bad ki rang jong ka West Garo Hills, ki la long ki kynhun kiba la ïoh ba kin khur ïa ka nam kum ki lahduh ha ka jingïalehkai jong ka volleyball ha ka lympung ïalehkai jong ka Meghalaya Games kaba san ba la long ha Tura.
Ha ka jingïakhun ïa ki final kiba la long mynta ka sngi Saitjain ha Tura, na ka lïang ki thei ïalehkai jong ka South West Khasi Hills ki la lah ban pynliem noh ïa ki thei ïalehkai jong ka South West Garo Hills da 3-0, (25-22, 25-11 bad 25-20).
Katba ka kynhun kaba wan ba lai na kane ka jingïakob kaba mynta ka kynti dei ka East Khasi Hills District.
Haba phai sha ki khynnah shynrang hapdeng ka jingïakhun kaba itynnad bad ïa bïang bor bha, ki rang ka West Garo Hills ki la lah ban pynliem noh ïa ka South West Khasi Hills da 3-0 (25-23, 25-13 bad 25-15).
Ka kynhun kaba la lah ban ïoh bat ïa ka kyrdan kaba lai dei ka South West Garo Hills District. Ha kane ka kynti ïakhun kaba mynta, ka la don ruh ka jingsam ïa ka khusnam rang bad thei ïalehkai kaba kynsai, ha kaba na ka lïang ki shynrang, ïa kane ka nam la ïoh ban rah ïa ka da u la rah u Chasarang Ch Sangma jong ka West Garo Hills uba da shisha u kylla long u samla ïalehkai uba da tbit bad pnah bha ban da lah syndon ba un lam khmat ïa la ka kynhun ban khur ïa ka jingjop.
Katba na ka lïang ki khynnah kynthei, ka nam thei ïalehkai ba kynsai ka leit sha ka Tachi M Sangma jong ka South West Garo Hills.
Ha kane ka jingïakhun la wan ban sakhi lang da u bah Hamlestson Dohling, ba dei artad u nongaibuit ïa u Myntri Rangbah ka jylla, ki dkhot nongkitkam ka synjuk ïalehkai volleyball ka jylla bad sa pynshongshit daka jingwan ïa sakhi lang jong ki samla ka sorbah na Tura.
