Shillong, Kyllalyngkot 27: Ka jingpyrshang jong ka Meghalaya ban shan kham slem ïa kylla tied kaba ar ka la kut noh ha ka step jong ka sngi ïakhun ba saw jong ka Ranji Trophy 2024-25 Elite Group A pyrshah ïa ka Odisha ha madan kriket MCA kaba ha Polo hynnin ka sngi.
Ka Meghalaya ka la shah pynkut noh na bynta 294 ron, ka jinglah kamai ron kaba kham seisoh haba nujor ïa ka kylla tied ba nyngkong (1st inning) ba ka la kamai 198 ron, bad kumta ka la shah rem noh ha ka Odisha (kaba la pynbna ban pynkut noh da 548/7) da ka inning bad 56 ron.
Haba sdang biang na ka 221/6, u Jaskirat Singh Sachdeva jong ka Meghalaya u la pynbyrngia da ka jingïalehkai ba tbit jong u ha ka tied ban bynrap da katto katne ki boundari, hynrei ha kaba khadduh u la shah pynkhyllem na bynta ki 82 ron ha ka shrip jong u Sunil Kumar Roul (4/61). U Jaskirat u la mad ïa 140 tylli ki bol bad khyrwit 12 tylli ki saw ron (four). Kane ka dei ka ron kaba heh tam jong u ha ka jingïalehkai kriket jong ki lympung ba kham paw.
U Wanlambok Nongkhlaw ruh u la noh synñiang katto katne da kaba kamai 27 ron na ki 83 (2x4s), katba u Dippu Sangma u la kamai 21 na ki 43 (1×4, 1×6).
U rangkawang bol ba stet (fast bowler) jong ka Odisha – u Tapas Kumar Das, u ba la khur 6/67 ha ka inning ba nyngkong bad 1/57 ha kaba ar, u la ïoh ïa ka nam Player of the Match.
Ka Meghalaya kan pynkhreh ïa ka jingïalehkai ba khadduh jong ka Ranji Trophy mynta ka samoi pyrshah ïa ka Mumbai shabar nala ïing ha ka 30 tarik mynta u Kyllalyngkot.
