Jop ka Bengal ha ka U-23 Col CK Nayudu Trophy ba nyngkong ha Tura

0

Shillong, Kyllalyngkot 25: Ka Bengal ka la pynliem ïa ka Meghalaya da 9 wiket ha ka lympung U-23 Col CK Nayudu Trophy 2024-25 jong ki shynrang ha madan kriket Alotgre ha Tura hynnin ka sngi. Kane ka dei ka sien kaba nyngkong ba la pynlong ïa ka jingïalehkai ka lympung BCCI ha Tura bad la ïaroh ïa ka jingtrei shitom jong ka Tura District Cricket Association da baroh.
Ka la long ka jingangnud kaba la slem bha na bynta ka MCA ban pynlong ïa ki jingïalehkai ha kane ka madan kaba itynnad bad ki dkhot jong ka TDCA bad ki groundstaff bad kiwei kiwei ki la aiti lut met bad ka mynsiem ban pynkhreh ïa ka madan, ka madan shabar bad kiwei kiwei ki jaka, ba la pynshlur da u President ka MCA u Nababrata Bhattacharjee.
U Myntri Rangbah ka Jylla- u Conrad K Sangma, u la donlang ban sakhi katto katne por ïa ka jingïalehkai jong ka sngi kaba ar.
“Kane ka jingïalehkai kan long ka lynnong kaba kongsan na ka bynta ka Sports ha Garo Hills bad kan prat lynti ban ai mynsiem ïa ka lawei ki nongïalehkai kriket ki ban sa wan,” la ong u MR ha rynsan social media. “Ka jingai khubblei ïa ka BCCI, CAB (Cricket Association of Bengal) bad ka MCA na bynta ka jingtrei shitom bad ki jingtei kiba la khamheh ban pynurlong ïa kane. To ngin rakhe ïa kane ka sienjam bad khmih lynti ïa kiwei pat ki jingïalehkai ha ki por ban wan.”
Haba phaidien, ka Meghalaya ka la out lut baroh na bynta 133 ron ha ka Inning kaba nyngkong hadien ba ka la shah pyntied nyngkong bad nangta ka la pynkut ïa ka Bengal na bynta 225 ron. Kaba la pynlong ïa ka Bengal ban lamkhmat da 92 ron ha kane ka Inning. Ha ka Inning kab ar ka Meghalaya ka la shah pynkut noh da tang 100, kaba mut ba ka Bengal ka donkam tang 9 ron ban jop, ïa kaba la pyndep tang na bynta u wei u wiket.
Ki nongïalehkai ka Meghalaya kiba la seisoh ki long u PM Santhosh (3/32 naki 10 over), Bipin Kr Ray (3/41 naki 18) bad u Manish Sharma (3/76 naki 21.4). Lah ban kdew ba ka Meghalaya ka la duna palat ha ka liang ki nongtied hynrei u Swastic Chettri u la kamai 48 ron naki 104 bol ha ka Inning kaba ar hadien ba ïarap 26 ron naki 56 bol ha kaba nyngkong.
Ka jingïalehkai ba khadduh jong ka Meghalaya kan long pyrshah ïa ka Vidarbha ha Nagpur ban sdang naduh ka 01 tarik Rymphang.

Leave A Reply

Your email address will not be published.