Ha ka sien ba nyngkong rung final ka Mawlai ha ka Meghalaya State League

Shillong, Kyllalyngkot 27: Ka Mawlai ka la shim ïa ka sienjam kaba heh ban rung sha ka phainal ha ka sien ba nyngkong ha ka lympung Meghalaya State League hadien ba pynliem ïa ka Ladthadlaboh da 1-0 kol ha ka jingïalehkai semifinal kaba nyngkong ha madan First Ground-SSA Stadium , Polo, ha ka janmiet sngi Nyngkong.
ïa ka namtam la thep da u Manbhalang Chyne ha ka minit kaba 29 jong ka kylla step bad ka Ladthadlaboh kam shym la don lad satia wat hapdeng ki jingpyrshang kiba paka ba la wan na ki rangïalehkai jong ka.
Ka Mawlai, kaba la shah pynkhyllem ha ka semi final ha u snem 2023, kan ïakynduh ïa ka kynhun ba jop ha ka semifinal kaba ar mynta ka sngi, ka ban long hapdeng ka Rymbai Shkenshynriah bad ka Shillong Lajong ha Wahiajer Multipurpose Sports Complex. Ka jingïakhun kan sdang ha ka por 1:30 mynsngi.
Ka jingïalehkai hynne ka sngi la pynlong ha ka por janmiet da ka jingïarap ki kor floodlight bad ki la don shibun ki nongkyrshan na baroh arliang, bad kiba bun ki la wan naduh West Jaintia Hills ban wan ai ka jingkyrshan ïa ka Ladthadlaboh, kaba ïakhun ïa ka semi final kaba nyngkong ha ka MSL.
Dei u rangïalehkai jong ki – u Buromlangki Salahe uba la ïoh ban pyrshang shut nyngkong eh sha kol hynrei la shah khanglad noh ha u Lambhamiki Lamare – rangapkol ka Mawlai, uba ka kura pynkiar sharud ïa ka bol ban pyllait na ka jingma.
Ka Mawlai ka la ïai bteng ban pashat ïa ka bol shakhmat na bynta u Donlad Diengdoh, u ba dei u striker jong ka, bad ka kol ka la urlong hadien ka bol kaba jrong kaba la ïohi ba u Donlad uba la pyllait lyngba ki bak ka liang pyrshah. Ka jingbym lah u rangapkol ka Ladthadlaboh – u Ialamlang Biam, ban bat ïa ka bol ha ka por ba u la mih shabar ka la ailad ïa u Donlad ban pyndei tiak bad knieh jyndat ïa ka. Hynrei, u la shah knieh pat ha u bak ka liang pyrshah bad dei ha kane ka por ba ka jingbakla kaba pynsngewsih ka jia. U rangïalehkai ba shadien u la iehnoh ïa ka bol na bynta u Ialamlang ban pynkiar sharud na ka jingma, khlem da tip, u nongap kol u la kynrandien biang sha ka kol bad kane ka la plielad ïa u Damanbhalang ban mareh pynstet ban thep jlang shapoh kol.
Ka Ladthadlaboh ka la pyrshang ban wanphai biang ha ka jingïakhun hynrei kam shym la shem ïa ka lad ban pynpra ïa ki rangapdien jong ka liang pyrshah, katba ka Mawlai ka la ïoh ïa shibun ki kabu ba paka ban pynjlan ïa ka jingïoh lamkhmat jong ka hynrei kim shym la lah ban pynurlong. Ka jinghap slap kaba jur ka la nang pynshongshit ïa ka jinglong jingman jong kane ka jingïalehkai ha kaba ki nongkyrshan ki la sahkut haduh ban da pynsawa ïa ka jingput ba khatduh.
U Ialamlang, kapten jong ka kynhun ba shah rem, u la jaw ummat brup ha kaba kut, lehse ka dei na ka daw ba u sngew sahnud ïalade namar ka jingbakla kaba la pynmong ïa ka kynnhun, hynrei watla kata ruh, u la mad ïa ka jingïalehkai kaba bha ha kiba bun ki khep, da kaba ïada ruh ïa ka jingpyrshang jong u Donlad ha ka kylla miet kaba dei hok ban kdew kyrpang.
Mynta baroh kin phaikhmat sha Wahiajer na bynta ka semifinal kaba ar. Ka MSL kaba la pynlong da ka Meghalaya Football Association bad kaba la kyrshan da ka Sorkar Meghalaya, ka ju wanrah ka jingkyndit ha ki wat ïakhun knockout bad ka R Shkenshynriah kan sa pyrshang ban wanrah ïa ka jingpyn kyndit ynda kan aireng pyrshah ïa ka Lajong (lahduh ha u snem 2019) mynta ka sngi ha Wahiajer.