OC Blue SPL 2024: Kthang ka Nongrim Hills ba shah rem haduh 6 kol ha ka Rangdajied

0

Shillong, Kyllalyngkot 24: Ka Rangdajied United FC ka la jop da 6-0 kol ban nang pynmong shuh shuh ïa ka Nongrim Hills SC ha ka OC Blue Shillong Premier League 2024 ba la long ha madan First Ground-SSA Stadium, Polo, ha ka sngi saitjaiñ jong ka taïew ba ladep.
Ka jingïalehkai shuwa kane, la sakhi ïa ka Nangkiew Irat SC kaba la ïasam mar shi point bad ka Langsning FC hadien ba ïakhaid da mar kawei (1-1 kol).
Ha ka jingïalehkai kaba ar, ka Rangdajied ka la ïoh ban thep ar kol tang ha ka khyllipmat jong ki shiphew minit mar ïa sdang lyngba u Owanijuh Pajuh (6′) bad u Arlangky Nongsiej (9′) bad ka la nang pynkthang shuh shuh ïa ka Nongrim Hills da kaba pynkhih biang sa ar tylli kin kol ha ka kylla step na u Dibormi Kassar (26′) bad u Owanijuh (34′) sa shi sien.
Ha ka kylla miet, ka bol pashat ba la pynbuh da u Aenam Jyrwa la ïoh ban pynthikna da u Freddy B Jyrwa (68′) ban thep sha kol shuwa ba u Manbhakupar Iawphniaw (77′) un tehlakam bad rah marwei ïa ka bol haduh ban poi phyllaw kol jong ka Nongrim Hills ban thep ïa ka.
Haba phaidien, ka RUFC ka la jop ruh ïa ka jingïakhun 1st Leg ha ka 8 tarik Naiwieng da 1-0 kol.
Ha ka jingïalehkai kaba nyngkong, u Rhitso Mero (25′) u la thep ïa ka kol kaba nyngkong na bynta ka Langsning ha ka kylla step. Ka Langsning, kaba la mad ïa ka namrem da 3-1 kol ha ka jingïakhun 1st Leg ha ka 29 tarik Risaw, ka la kyrmen ban khur shalade ïa ka namjop hynrei u Jefferson Pakyntein (90’+2) u la pynïakhaid noh ha ka khyllipmat jong ki minit pynjlan ïa ka por kaba la pyllait im ïa ka Nangkiew Irat.
Ka jingïalehkai OC Blue SPL 2024 mynta ka sngi kan long hapdeng ka Sawmer SC bad ka Laitkor SC ha ka por 2 shiteng mynsngi. Haba phaidien, ka Laitkor ka jop da 2-0 kol ha ka 1st leg ha ka 28 tarik Risaw.

Leave A Reply

Your email address will not be published.