Shillong, Rymphang 18: U Raj Biswa u la khyrwit ïa ka spah ron na bynta ka Meghalaya ha ka sngi ïakhun ba lai jong ka Ranji Trophy Plate Group final pyrshah ïa ka Hyderabad hynne ka sngi.
Haba phaidien, ka Meghalaya ka la tied 304 ron ha ka inning ba nyngkong ïam kaba ka Hyderabad ka la jubab da 350 ron. Hynne ka sngi, ka Meghalaya ka la shah pynkhyllem noh hadien ba kynjoh sha ka 243 ron ha ka inning tied ba ar, ha kaba ka Hyderabad ka donkam ban tied 198 ron ban jop. Haba shimti ïa ka pali tied, ka Hyderabad ka la kamai 71 ron hap 1 wicket, bad dang donkam sa 127 ron ban tied mynta ka sngi ban khur ïa ka namjop.
U Raj u la tyngshaiñ bha ha kane ka jingïalehkai, da kaba khyrwit haduh 11 tytlli ki four bad saw tylli ki six naki 114-bol. U la shah pynkhyllem noh hadien ba kynjoh thik 100 ron ha u Rishab Baslas, u rangkawangbol ba u Raj u shem shitom ban kamai ron. Ha kawei pat ka liang, u rangkawangbol ba shah tied jem ha u Raj u dei u ba seisoh tam jong ka kynhun Hyderabad, kata u Tanay Thyagarajan. U Raj u la tied haduh 55 ron na ki 50 bol jong u Tanay, ha kaba baroh saw tylli ki six u la khyrwit pyrshah ïa u Tanay, u rangkawangbol ba la pynhap haduh san ngut ki rangtied ka Meghalaya.
Kane ka dei ka sien kaba ar ïa u Raj ban khyrwit ïa ka spah ron mynta ka samoi, hadien ba u la khyrwit spah ron pyrshah ïa ka Mizoram ha u bnai ba ladep. U la tied ruh 64 ron hynnin ka sngi Saitjaiñ ha ka inning tied kaba nyngkong.
Watla ki la don ki paralok ba mih ryngkat kiba la shah pynhap kham kloi, u Raj u la ïoh jingkyrshan ban kyntiew ïa ka ron bad u Jaskirat Singh Sachdeva, u ba la tied 81 ron na ki 157 bol (10x4s, 2x6s). Ryngkatlang ki la kyntiew 102 ron shuwa ban hap u wicket ba saw, kaba la ai mynsiem ïa ka kynhun.
Watla ka thong ka long tang 200 duna, hynrei kane ka la biang ïa ki rangkawangbol ka Meghalaya ban pyrshang pynhap kham kloi ïa ka Hyderabad. U Chengkam Sangma u la pynhap noh ïa u Tanmay Agarwal (0 ron), katba u Rahul Singh Gahlaut u la tied 50 (not out) naki 29 bol ban buh ïa ka Hyderabad sha ka 71/1 shuwa ban khylliap ïa ka sngi.
Kumba ka long, ha ka inning ba nyngkong, ka Meghalaya ka la kylla long ka kynhun ba nyngkong ban pynkhyllem baroh ki rangtied ka Hyderabad mynta ka samoi, bad ka kynhun ka khmihlynti ban leh kumjuh mynta ka sngi.
