Shillong, Kyllalyngkot 18 : Ka Meghalaya ka la lah ban ïalehkai bha hadien ba ka la shah lamkhmat da 294 ron ha ka inning ba nyngkong ha ka Bihar ha ka jingïalehkai kaba la ïaid ar sngi jong ka jingïalehkai semifinal na ka Plate Group jong ka Ranji Trophy Plate Group ha madan madan Polo hynne ka sngi Balang.
Haba bteng biang ïa ka inning kaba nyngkong ha ka jingkamai ba 329 duh noh 6 wicket, ka Bihar ka la shah pynhap lut baroh ki wicket bad kamai 428 ron bad ha ka pali kawang bol ka la pynliem baroh ki wicket ka Meghalaya tang ha ka jingkamai ba 134 ron. Haba wan biang ban tied ha ka inning kaba ar, ka Bihar ka kamai 28 ron da kaba lamkhmat da 322 ron.
Ka Bihar ka la lah ban kamai ron pyrshah ïa ka Meghalaya lyngba ka jinglah ban ïalehkai bha ki rangtied kiba la neh haduh ka jing bamja sngi.
U Swarajeet Das (1/5) u la ïoh ban pynhap ïa ka wicket jong u Veer Pratap Singh uba kamai 50 ron ha ka over kaba nyngkong lyngba ka lbw. U Kishan Lyngdoh u la lah ban pynhap wicket hadien ba ka bol ba u la kawang ka la leit dei ïa ki stump. Uwei pat u rangtied ka Bihar u la shah pynhap wicket ha ki kti jong u Akash K Choudhury uba ïoh ban khur 2 wicket ai kamai 83 ron bad u Rajesh Bishnoi uba dei u Guest Profesional u ïoh 1 wicket ai kamai 113 ron bad u Abhishek Kumar u ïoh 2 wicket ai kamai 89 ron.
Haba beh ïa katei ka ron, ka Meghalaya ka la shah pynhap wicket noh ha ki rang kawang bol ka Bihar da kaba duh noh shwa ïa ki saw wicket.
U Raj Biswa u kamai 3 ron bad u Das u la shah pynhap wicket khlem da ïoh ban kamai ron kiba la shah pynhap ha ki kti jong u Nawaz uba ïoh ban khur 2 wicket ai kamai 31 ron hashwa ba u Kishan Lyngdoh bad u Punit Bisht uba dei u guest professional kin buh 57 ron ha ka jingduh noh lai wicket.
Hynrei u Kishan u la hap wicket noh bad kamai 32 ronbad u Rohit Shah uba mih madan nyngkong ha ka jingïalehkai first-class u la kamai 9 ron ïa kaba la ïoh kem bol da u Bipin Saurabh uba dei u rangap wicket ka Bihar, uba dei ruh u rangtied kynsai ka Bihar ha ka sngi sdang.
U Bisht ruh u la ïoh ban kamai 38 ron hashwa ba un shah pynhap wicket noh ha ki kti jong u Ashutosh Aman uba ïoh ban khur 4 wicket ai kamai 21 ron.
U Bishnoi (40 not out) u la pyrshang ban kamai ron hynrei u la shah pynhap wicket noh lyngba ka run out ha ka jingmih madan lang bad u Tarique Siddique (4) lyngba ka lbw. U Choudhury (4) katba u Arbin Singh (0) bad u Kumar (0) baroh arngut ki khlem ïoh ban kamai ron.
Watla u la shah pynhap wicket noh khlem da kamai ron, hynrei ka jingïaroh ka leit sha u Dippu Ch Sangma, uba la lah ban ïalehkai bha watla hapdeng ka jingmynsaw kaba la jia ha ka sngi sdang ha ka por ba u dang thmu ban kem bol.
Pynban utei u rangïalehkai ha ka jingïalehkai kaba la ïaid ar sngi u la pyrshang ban ïalehkai tyngeh na ka bynta la ka jong ka kynhun.
Ka Bihar ka khmih lynti ba kan lah ban pynliem lyndang ïa baroh ki rangtied ka Meghalaya ha ka jingïalehkai ha ka sngi kaba bud khnang ba kan ïoh rung sha ka phainal jong ka Plate Group. Katba ka Meghalaya ka donkam ba kan ïalehkai bha ha ka liang ka kawang bol khnang ba kan lah ban lait na ka jingshah rem.
