Shillong, Kyllalyngkot 04 : Ka Meghalaya ha ka inning kaba nyngkong jong ka lympung ïalehkai Ranji Trophy na ka plate group ha ka jingïakhun pyrshah ïa ka Arunachal Pradesh ka la kamai 610/6, ha kaba u Tarique Siddique u kylla long player uba lai jong ka kynhun ban hyrwit ïa ka century.
Haba tied biang ha ka sngi kaba ar, ka Arunachal ka la kamai 148/4, kaba duna 462 ron na ka jingkamai ron ka Meghalaya ha ka inning kaba nyngkong.
Ha kane ka sngi, u Siddique (not out) u kamai 21 ron katba u Punit Bisht (guest professional) u kamai 205 ron khlem da shah pynhap wicket. U Punit Bisht u khlem lah ban pynneh ha ka inning, hynrei utei u rangap wicket uba dei ruh u kapten u la shah pynhap wicket ha ka over ba 20 da kaba kamai 215 ron na ki 213 bol. Kiwei pat ki rangtied kiba la kamai ron ki kynthup u Kishan Lyngdoh u kamai 128 ron ha ka sngi ba ar.
U Siddique uba ïalehkai arsien mynshwa ïa ka jingïalehkai first-class, ha u 2018, bad u kamai bun ron da ka shi ron ha ki saw inning. Hynne ka sngi, hadien ba u la pynpaw pyrthei biang ïa ka sap ïalehkai na bynta ki saw snem ba la leit noh, utei u rangtied kadiang u la kamai 102 ron (not out) na ki 189 bol ba kynthp 13 tylli ki four.
Ma u ha ryngkat u Rajesh Bishnoi (guest professional) u kamai 57 ron khlem shah pynhap wicket u la kamai 129 na bynta ka jingpynneh ïa ki hynñiew wicket ha kaba ka Meghalaya ka la lah ban kamai 600 tam.
Haba beh ïa katei ka ron, ka Arunachal ka la duh noh saw wicket hynrei u Anup Ahlawat u la lah ban neh ha ka jingkamai ba 123 ron na ki 124 bol kaba dei tang kane ka jingkamai ron ha ki lai inning jong ka jingïalehkai first-class. Utei u rangïalehkai ba dang 22 snem u la khyrwit 20 tylli ki four bad ar tylli ki six.
Na ki rang kawang bol ka Meghalaya, u Dippu Ch Sangma u ïoh 1/18, Abhishek Kumar 1/21, Arbin Singh 1/31 bad u Bishnoi 1/43. U Ahlawat un dei u rangtied uba don jingkyrmen na bynta ka Arunachal Pradesh ha kaba ka Meghalaya ka donkam ban pynhap kloi noh lashai ka sngi Palei.
