Ka elekshon kaba la long ha u snem 2018 ka la sei pyrthei ïa ki seng saiñpyrthei kiba thymmai bad ka Peoples Democratic Party (PDF) kaba la mih bloit ha une u snem ka la lah ban sei haduh saw ngut ki MLA hynrei tang san snem ruh ym pat kut arngut ki MLA na kane ka party ki la pynbna ban ryngkang noh sha ka National Peoples Party kaba ïalam ka Sorkar khleh khaw lang. Hynrei watla ki arngut ki MLA ki la pynbna paidbah ban ryngkang noh sha ka NPP hynrei haduh mynta ka PDF ka dang sah mynsiem bad ka dang ïaksaid katba lah ban pynneh ïa la ka jong nongrim kumba ka ladep khlei ha ka elekshon 2018. Kumba ka paw byrngut byrnget, ka PDF kan dang lah ban jop biang sa kumba saw ngut ki MLA lada ka ïoh ïa ki kyrtong kiba biang ha ka elekshon 2023.
Ka jingkylla syndet jong ka saiñpyrthei ha kane ka jylla Meghalaya ka la jia naduh ka sngi ba ki 12 ngut ki MLA ka seng Congress hapoh ka jingïalam jong u Dr. Mukul Sangma ki la leit ban pynïasoh bad ka Trinamool Congress kaba la ïoh ban suhthied ha kane ka jylla khlem da donkam ban ïakhun ha ka elekshon. Nalor kata, sa sa ngut ki MLA jong ka Seng Congress kiba shah sospon, lai ngut kiba kynthup ïa ka Dr. Ampareen Lyngdoh kaba mihkhmat na East Shillong Constituency, u Bah Mahendro Rapsang uba mihkhmat na West Shillong Constituency bad u Bah Kimfa S. Marbaniang uba mihkhmat ïa ka Rambrai-Jyrngam Constituency ki la iehnoh ïa ka jinglong MLA ban pynïasoh ïalade bad ka NPP.
Kumba ka paw mynta ka NPP ka la khur lypa san ngut ki Sitting MLA ba la resaiñ jong ka seng Congress bad ki arngut ki MLA jong ka PDF kiba kynthup ïa u Bah Hamletson Dohling uba mihkhmat na Mylliem Constituency bad u Bah Jason Mawlong uba mihkhmat na Umsning Constitunecy.
La bna paidbah ba ki arngut ki MLA ba la shah sospon jong ka Seng Congress, kata, u Bah Process T. Sawkmie bad u Bah Mayral Born Syiem kin pynïasoh noh ïalade sha ka UDP.
Hangne ka jingïohnong ka long ïa ka NPP kaba la ïoh bat san ngut ki Sitting MLA, katba ka UDP ka dang ïoh tang arngut.
Katba ki sngi bad ki taiew ki nang tyllun sha ka elekshon ban jied ïa ki nongmihkhmat ba thymmai, manla ka sngi u paidbah ruh un sa sakhi ïa ka jingïarung ïa mih bad ka jingïaryngkang party jong ki kyrtong, ki sitting MLA bad ki Sitting MDC tang ban myntoi shwa ka malade shimet.
Watla ka HSPDP kan sa duhnoh ïa ki arngut ki MLA, kata ïa u Bah Samlin Malngiang bad ïa u Bah Renikton L. Tongkhar pynban u saihon jong kane ka seng saiñpyrthei u dang mih hi liap liap bad um pat lip jynduh.
Na ki jinglong jingman, kaba isangsot mynta ka long ïa ka seng Khun Hynñiewtrep National Awakening Movement (KHNAM) kaba u MLA ba marwei u Bah Adelbert Nongrum ula pynpaw ïa ka mon ba u kwah ban ïakhun noh na ka Voice of the People Party, ka seng saiñpyrthei kaba dang thymmai hynrei u nongïalam rangbah u Bah Ardent M. Basaiawmoit bad katto katne na ki nongkitkam ki dei kiba la ju don bynta ha ka saiñpyrthei naduh ki snem kiba ladep.
Mynta ka jingkylli ka long hato ka PDF kan dang lah ban jop biang haduh saw ngut ki MLA kumba la long ha u snem 2018? Hato ka HSPDP ruh kan dang lah ban thaw pyrthei ha u snem 2023? Kumjuh ruh ka VPP kaba dang thymmai kan lah mo ban pynjop ïa ki kyrtong kiba dang shu mad ha ka sien nyngkong eh ban aireng ha ka elekshon ha kane ka kynti hynrei lait noh u Bah Ardent Basaïawmoit uba ladep long MLA la ar samoi kynthih na Nongkrem Constituency?
Ka jingma ka ap ruh ïa ka seng Congress ha kane ka jylla, hato kan dang lah neem ban khie khlieh ha u snem 2023 hadien ka jingphet sakma jong ki 17 ngut ki Sitting MLA kiba la sakma kum ki langbrot khlem nongsharai hadien ka jingshah jied jong u Bah Vincent H. Pala ban long u nongïalam ba hakhliehduh jong ka Meghalaya Pradesh Congress Committee.
Lada ka bor pisa kam lah ban trei borbah khlempep ka jingjop jong ki Party heh kan kham jwat bad ha kaba khatduh hi ka UDP bad kiwei de ki seng saiñpyrthei kiba kham jop duna ki MLA bad ki MLA Indenpendent kin shu long tang ki rong ser ynda la thaw ïa ka Sorkar kaba thymmai ha u snem 2023.
U paidbah mynta u dei uba la nang la stad bad ka jingtrei borbah jong ka Social Media mynta ka kynti kan sa pynkylla pyrdet lut ïa ki Sitting MLA ha kaba arphew na ka shispah lehse kin sa mad ïa ka namrem bad ki dur khmat ba thymmai kin sa paw ha ka Iingdorbar Thawaiñ ka Jylla kaba don 60 ngut ki dkhot.
