Ha ka 1 tarik jong u snem ba thymmai shah pynkyntang Lyngdoh ïa ar ngut ki ‘Deacon’

Mawkyrwat, K’lyngkot, 04: U Archbishop jong ka Jylla Niambah Shillong, u Most Rev. u Victor Lyngdoh ha ka jingkren jong u ha ka jingïaseng ban pynkyntang Lyngdoh ïa ar ngut ki ‘Deacon’ kiba dei na ka Parish Nativity of Our Lord u la pynkynmaw ïa ki ktien kiba ong, “Im ïa ka jinglong khristan da ka jingkyrmen bad ka jingieid, to kin long ki atiar jong ka jingngeit ha une u snem ba thymmai”.
Lah ban kdew ba ki ar ngut ki ‘Deacon’ kiba la shah pynkyntang ha ka 1 tarik u Kyllalyngkot, 2023 ha madan jong ka Nativity Higher Secondary School, Mawkyrwat ki long u Deacon Aiborlang Nongsiej bad u Deacon Lamkupar Shangdiar bad shwa kata la sdang ïa kane ka sngi bakhraw da ka jingïaid procession jong ki Lyngdoh bad ki deacon ki ban shah pynkyntang sha Duwan, ryngkat ka jingsynranlang jong kiba ha ïing ha sem jong kine ki Deacon.
Shuh shuh ha kane ka sngi la pynbynta ïa ka Mass Bakhuid da u Archbishop jong ka jylla Niambah Shillong, u Most Rev. u Victor Lyngdoh, ha ka jingdonlang jong u Administrator jong ka Jyllaniam Nongstoiñ u Fr. Anslem Nonglang bad u Provincial jong ka Jingïasyllok Salesian u Fr. Paul Olphindro Lyngkot bad kiwei kiwei ki Lyngdoh Sohblei na ki Parish bapher bapher na kylleng sawdong.
U Most Rev. Victor Lyngdoh ha ka jingkren jong u, u la kyntu ïa baroh kiba wan ban ïa shimbynta ïa kane ka sngi bakhraw bad khamtam ei ïa ki ar ngut ki ban shah pynkyntang ba haba ki im bad ïaid ha ki sngi ki ban sa wan kin im katkum ka kular kaba kin sa shim ban shakri ïa ki paidbah jong ka Balang ha ki bynta baroh. U la ong ba ruh ba kum ki riew niam ka dei ka kamram jong ki ban hikai ïa kiwei pat bad ban seng ban kyntu khnang ba kin lah ban im ka jingim kaba bha, ban sngap ïa ki jingbthah jong kiba halor.
U la bynrap shuh shuh da kaba ong, “Ainguh ïa U Blei ba phi la sngap ïa ka jingkhot ka jong U ban long ki Lyngdoh haduh kaba kut, ki Lyngdoh ki dei ki nongtrei ban sharai ïa ki paid jong U Blei, ki dei kiba jam tam ha U Trai Jisu Khrist”. U la ong shuh shuh ba ki lyngdoh ki hap ban shim ïa ka jaka jong U Khrist khamtam ha ki sakrament bakhuid, ka long kaba khraw namar phi la shah pynsleh kyrpang, ban ïalap ïa ka Ktien jong U Blei sha baroh.
U Most Rev. Victor u la kit bok kitrwiang ïa ka Parish kaba dang pynkhreh ban rakhe ïa ka Jubili Ksiar, ha une u snem 2023. U la ong ai nguh ïa u Blei na ka bynta ki Missionary kiba la wan ban ïuhkjat nyngkong ha kane ka thaiñ, ïa ki riewngiet kiba nyngkong ban pdiang ïa kaba Balang bad kaba pynlong ban roi haduh katne kumba ka long mynta.
To kyrkhu kylliang iwei ïa iwei pat, ki kmie ki kpa ïa la ki jong ki khun ki kti, ki khun ki kti ïa la ki jong ki kmie ki kpa bad ki Lyngdoh ïa la ki jong ki paid riew ngeit ban ïoh ïa ka jingkyrkhu kaba kyrpang. Hadien ka Mass Bakhuid ka la don ka jingleh burom kyrpang ïa kine ki Lyngdoh ba thymmai da ka Parish bad ki don ruh ki jingshad ki jingrwai ban pynphuh pynphieng shuh shuh ïa kane ka sngi.
La pynkut ïa kane ka sngi da ka jingkyrkhuh lyngba u Lyngdoh ba thymmai u Fr. Aiborlang Nongsiej bad u Fr. Lamkupar Shangdiar.