Shillong, K’lyngkot, 04: Ka Khun Hynniewtrep National Awakening Movement (KHNAM) ha ka sngi Saitjaiñ ka la kyntait ban ai tiket ïa ki kyrtong kiba kwah ban ïakhun ïa ka elekshon MDC sha ka Jaiñtia Hills Autonomous District Council (JHADC) ka ban sa long ha ka 21 tarik Rymphang, 2025.
Ha ka jingïakren bad ki lad pathai khubor hadien ba la wai ka jingïalang kaba la long ha Shillong Club, u General Secretary jong ka KHNAM u Bah James M.A Neng u la ïathuh ba ka daw hi ka long namarba ki paidbah ha rilum Jaiñtia kim pat da sngewthuh bha ïa ki nongrim jong ka party.
“Ha Jaiñtia Hills watla ki don ki katto katne ki riewrangbah kiba la wan shakhmat, kumba, 4-5 ngut ban pan tiket na ka party jong ngi, hynrei katkum ka jingpeit jong ka seng ngi sngewba ha rilum Jaiñtia ka seng jong ngi kam pat suhthied bha lehse ki paidbah kim pat sngewthuh bha ïa kane ka seng,” u la ong.
“Ngi ïohi ruh ba ki briew kiba wan pan tiket ha ka jingpeit jong ngi ngim pat idei satia ban ai tiket. Ngi sngewba na ka bynta ka rilum Jaiñtia, da kaba burom ïa ki paidbah ka rilum Jaiñtia, ba kin ym sngew eiei ha kane ka por ba ngin ym lah ban ai tiket ïano ïano ruh ha kane ka kynti ba mynta,” la bynrap u Bah Neng.
Haba pynpaw ïa ka nongrim ba ka KHNAM ka ieng u Bah Neng u la ong, “ka nongrim jong ngi ka long ban kyntiew, ban ïalam bad ban ïada ïa ka ri bad ka jaidbynriew bad kata ka dei kaei kaei kaba ngi ju pyrkhat na ka por sha ka por bad kaba ngi ju kren sha ki paidbah.
“Ha ka party jong ngi, ngi sngew ba ka elekshon MDC ka dei kaba kham kongsan na kiwei pat ki elekshon namarba kane ka ktah beit ïa ka ri bad ka jaidbynriew jong ngi, ka ktah beit ïa ki paradoh parasnam jong ngi namarba dei lyngba ka Autonomous District ngi lah ban pynneh pynsah ïa ka jinglong ba kyrpang jong ka ri bad ka jaidbynriew,” la pynpaw u General Secretary ka KHNAM.
U la ïathuh ba ki kyrtong kiba ka KHNAM ka la ai tiket ha ka elekshon MDC ki dei kiba sngewthuh bha bad kiba don ka jingnang ka jingtip bad kiba trei shitom. “Ngi don ïa ka jingkyrmen kaba skhem ha kine ki kyrtong ba une u snem 2025 ngin ïoh ïa ki nongmihkhmat jong ngi sha ka Khasi Hills Autonomous District Council.
“Ha ka thup banyngkong ngi la pyllait ïa ka kyrteng jong ki phra ngut ki kyrtong. Ha ka thup kyrteng kaba ar ki la don 10 ngut ki kyrtong kiba pan tiket na kiwei ruh ki Consituency tangba haduh mynta ngim pat shim ïa ka rai. Ka don ka State Election Committee (SEC) bad ki don ki kyndon kiba yn hap ban ïaid kumno ka Committee kan pyndep ïa la ka jong ka kamram bad ynda la poi sha ka Central Executive Committee (CEC) ngin sa shim ïa ka rai kaba khatduh,” ong shuh shuh u Bah Neng.
