Nongpoh, Nohprah 23: Ka kynhun jong ki nongñiah thuk thuk ha ka jylla ba la tip kum ka The Ultimate Legend Bikers Association (TULBA) Eastern Zone mynta ka sngi ka la pynlong da ka jingrakhe lehkmen bad ki riew tymmen ha ka shnong Umden Arka shuwa ban pdiang ïa ka Khristmas ka sngi ka jingwan longbriew jong u khyllung Jisu sha kane ka sla pyrthei.
Ha katei ka jingrakhe lehkmen khristmas la wan ruh ban donlang da u Bah Cornelius Laloo uwei na ki nongthoh khubor ba la kham rangbah na Ri-Bhoi, u Bah Robert June Kharjahrin u nongïalam barim ka HYC ba dei ruh u kyrtong ban aireng ïa ka elekshon MP ha ka jylla, Samla Samuel Kurbah President ka TULBA Eastern Zone, Samla Tyngshaiñ Makri President HYC Bhoirymbong, Samla Isynei Hinge Working President ka TULBA bad kiwei kiwei ki riew rangbah bad ki nongïalam shnong.
Na ka liang ka seng TULBA ha katei ka sngi ka la ïoh ruh ban sam da ki jaiñ syaid sha ki riew tymmen ha katei ka shnong bad kumjuh ruh ban ïa ot cake kum ka jinglehkmen khristmas.
Haba kren ha katei ka sngi na ka liang u Bah Cornelius Laloo bad u Bah Robert June Kharjahrin ki la ai khublei ïa ka seng TULBA kaba la shim ïa ka sienjam ban pynlong kum katei ka jinglehkmen khristmas bad ki riew tymmen kaba dei ruh kawei na ka seng treimon sngewbha kaba ju don bynta shibun ki kam noh synñiang sha ka imlang ka sahlang da ka jingkyrmen skhem ruh ba kin dang lah ban bteng bad shakri ha ka kam ba bha kaba ki trei ryngkat ka kyrkhu kyrdoh ba kane ka khristmas kan wanrah ka jingkmen ha ka met bad ka mynsiem bad u snem thymmai ba suk ba kmen ïa ki paidbah ha ka jylla baroh kawei.
