Shillong, Nohprah, 23: Ka KSU Mawlai Nonglum Unit ha ka sngi Saitjaiñ ka la noh synniang da ki duli Godrej buh tiar, lai phew tylli ki nep syaid bad saw tylli ki doormat sha kawei ka jaka ri ïa ki khunlung kaba don ha ka shnong mawlai Nonglum kum shi bynta ka jingrakhe ïa ka Christmas.
Ha ka jingaiti ïa kine ki tiar sha ka President jong ka Seng Kynthei Mawlai Nonglum ka Kong Mitimai Basaïawmoit la lamkhmat da u President ka KSU Mawlai Circle u samla Biangbor Paliar bad u President jong ka KSU Nonglum Unit Samla Wanstep Dkhar, u General Secretary u samla Edie Malngiang lem bad u General secretary jong ka KSU Nonglum Unit u samla Franky Lamin bad kiwei pat ki dkhot jong ka seng.
Ka Kong Mitimai Basaïamoit ka la ïathuh ba kane ka Creche ba la seng da ka Seng Kynthei ka la kynjoh mynta la 34 snem bad ka la batai ruh ïa ka jingthmu ba la buh ïa kane ka jaka ri bad sumar ïa ki khunlung kaba don 30 tylli ki jingthiah.
Ka la ong ruh ba ka jingdon jong kane ka Creche ka long ban ïarap ïa kito ki longkmie kiba kit khunrei kiba shu im kamai jakpoh da kaba leit trei bylla bad ki don ruh katto katne ngut kiba dei ki nongtrei sorkar kiba phah ri bad sumar ïa ki khun ki kti jong ki ha kane ka Creche.
Ka la pyntip ruh ba ka dor ba ka Seng Kynthei ki shim ka long kaba rit bha haba ïanujor bad kiwei kiwei pat ki Creche, namarba ka jingthmu jong ka Seng Kynthei ka long ban shim ïa ka dork aba duna khnang ban kyrshan lem ïa ki para longkmie kiba donkam ïa ka jingïarap.
Ka Kong Mitimai ka la ai khublei kyrpang ïa ka KSU Nonglum unit bad bad ïa ka KSU Mawlai circle kiba don ka mynsiem ban noh synñiang lem sha kane ka Creche kaba dang donkam ïa ki lad jingïarap.
U President jong ka KSU Mawlai Circle u samla Biangbor Paliar haba kren ha kane ka sngi, u la pyrto ïa ki kam ba radbah kiba ka Seng Kynthei Mawlai Nonglum ka la leh bad ïohi jngai naduh 34 snem mynshwa ban shim ïa ka sienjam ban seng ïa ka Creche da ka jingthmu kaba bha ban ïarap ïa ki paralongkmie kiba donkam ïa ka jingïarap khamtam ha ki por ba ki leit sha ki jaka trei jaka ktah bad ki kam ka jong ki.
U la ai ka jingïaroh ruh ïa ki longkmie kiba trei bad kiba sumar ïa ki khunlung ha kane ka Creche watla ki don la ka ing ka sem lajong hynrei ki la len ïalade ban peit ban khmih bad sumar ïa ki khunlung naduh ka khuid ka suba bad ka koit ka khiah jong ki khunlung.
Kane ka jingshimkhia jong phi ka pyni shisha ba phi la long kum kita ki kmie ki baar jong baroh ki khunlung kiba wan ban pynsah ha ka Creche jong phi, la ong u President ka seng.
Ha shwa ba yn sa kut noh ka program ka la don ka jingïa ot cake lang hapdeng ki nongkitkam jong ka KSU bad Sengkynthei kum shi bynta ban ïa rakhe ïa ka advance christmas.
