Shillong, Nohprah, 23: U President jong ka BJP Meghalaya State Unit u Rikman G Momin u la ïoh ka lad ban pynkupburom ïa u Myntri Rangbahduh ka ri u Narendra Modi ha ka jingïalangbah jong ka Party kaba la long ha New Delhi ha ka sngi Thohdieng.
Kane ka jingïohlad jong u Rikman ban ïakynjut kti ïa u Modi ka dei ha ka por ba la plie ïa ka jingïalang jong baroh ki nongkitkam ba halor duh jong ka BJP ryngkat bad ki President ka BJP na baroh ki jylla ka ri India.
La pynlong ïa kane ka jingïalang kum shi bynta ban pynkhreh na ka bynta ka elekshon sha ka Iingdorbar Thawain jong ka ri ka Lok Sabha ka ban sa wan.
Ka BJP ha ka jylla Meghalaya ka dap da ka jingsngewkmen ban ïohi ba u President ula ïoh ban ïashim bynta, ban ïathir sani halor ki jingeh bad ki jingdonkam jong ki nongshnong shnong ka jylla Meghalaya ha ka jingïalang ba hakhlieh duh jong ka BJP kaba la pynkut ha ka sngi Saitjaiñ.
Ha u kyrwoh ba la phah da u Chief Spokesperson ka BJP u Bah M. Kharkrang u la ong, “ka long kum ka jingkyrkhu ïa ka jylla Meghalaya hi baroh kawei khamtam haba ngin sa lehkmen ïa ka Khristmas bad ban pdiang ïa u snem thymmai da kata ka jingangnud ba shibun kiei kiei kiba bha kin sa wan sha ka jylla lyngba ki rai ba kane ka jingïalang kan shim na ka bynta ka jylla Meghalaya hi baroh kawei.”
