Shillong, Nohprah, 23: U Chairman-cum-Managing Director jong ka Meghalaya Energy Corporation Ltd (MeECL), Sanjay Goyal, u la pynthikna sha ki paidbah nongshong shnong jong ka jylla ba ki don hapdeng ka jingshngaiñ bad kumjuh ruh ki kali kiba ïaid lyngba ka jingkieng Damsite kaba dang don mynta hapdeng ka jingmaramot.
“Nga kwah ban kren da kaba shai hangne ba ki ar tylli, ka jingkieng bad ka Dam-ki long kiba shngaiñ,” ong u Goyal.
“Ngi ladep pynlong ïa ki jingtohkit bad ki stad wad bniah jong ki Agency ha kaba ïadei bad ka jingkieng bad ka pung Umïam. Haoid, namarba ki la rim, ki donkam ïa ka jingmaramot, ban pynbha khnang ban bteng ïa ka jingim jong ki,” u la ong.
Dang ha ki khyndiat taiew, la sakhi ba ki bor synshar jong ka Ribhoi District bad ki bor Pulit ki la hap ban pyrkhing ïa ka leit ka wan jong ki kali kiba ïaid lyngba ka jingkieng Damsite hadien ba la sdang ïa ka jingmaramot ïa ka jingkieng ha Damsite bad la khang ruh ïa ki kali heh ban ïaid lyngba ka jingkieng.
Shwa ban sdang ïa ka jingmaramot, ki riewshemphang, ki la peit bad bishar bniah na kaba sdang haduh kaba kut jong ka jingkieng bad ban peit thuh ruh ïa ka jinglong jingman jong ka jingkieng khnang ban lap ïa ki bynta ba la shong synjor, la ïathuh u Goyal.
“Namarba ka rta jong ka Dam, ki don bynta ba ki jaboh ki rung namar ka jingtuid jong ka um bad kumjuh ruh ki don ki bynta ba la pei. Ïa kine ngi la hap ban maramot,” la ong u Goyal.
Hadien ba ladep maramot, la khmihlynti ba ka jingim jong ka Damsite kan dang jlan sa kumba 40 haduh 50 snem.
Katkum ka jingsorjamin jong ka IIT Guwahati, ka jingkieng Damsite ka lah ban shan tang ïa ki kali kiba kit haduh 15 ton.
Ka Sorkar ka la bthah ïa ki bor synshar district bad ïa ki bor Pulit ba kin pyrkhing ïa ka ïaid ka ieng jong ki kali khnang ban pynthikna ba tang ki kali rit kin ïaid lyngba ka jingkieng katba ka jingmaramot ka dang ïaid shakhmat.
