Shillong, Nohprah, 23: U nongïalam jong ka Liang Pyrshah ka Khasi Hills Autonomous District Council u Bah Titostarwell Chyne u la ïathuh ba ka Council ka la thaw da ka Special Committee ban ïathir ïatai sani halor ka Khasi Hills Autonomous District (Social Custom of Clan Administration) Bill.
Ha ka jingïakren bad ki lad pathai khubor u Bah Titos u la ong ba ka Council ka la mynjur ïa ka Khasi Hills Autonomous District (Khasi Social Custom of Lineage (Amendment) Bill, 2023 hadien ba la shim rai ban pynsangeh shwa ban ïatai halor ka Khasi Hills Autonomous District (Social Custom of Clan Administration) Bill.
Shuh shuh u la ïathuh ba ïa ka Clan Bill la wanrah bad mynjur ha ka por ba u Bah HS Shylla u la long u Chief Executive Member ha u snem 2018 khnang ban pynkhlaiñ ïa ki Kur kiba don ha rilum Khasi hynrei ïa kane ka Bill la pynphai biang da u Lat ka Jylla sha ka Council. Hadien ba ka executive committee bathymai ka la shimti ïa u lakam synshar ha u snem 2019, la thaw ïa ka special committee ba la khlieh da u Bah Bindo M. Lanong uba long u MDC Shusieh bad ka la shimpor haduh 3 snem ban ïathir ïatai bad ki nongïalam jong ki Kur bapher bapher halor kane ka Clan Bill.
“Ha ka jingshisha, ka Lineage (Amendment) Bill ka dei tang ka kopi ba la shim na ki Clauses jong ka Clan Bill. Hynrei, kawei na ki daw kaba ngi la mynjur ïa ka Amendment Bill ka long ban pynrung ïa ka Shaw Bhoi ha Ri Bhoi District. Bun na ki khynnah skul kim ïoh ïa ki Scheduled Tribe Certificate namarba ngim pat shym la ai ïa ka synot ba ki dei ki Khasi,” u la ong.
U la ai khublei ïa u MDC jong ka Nongpoh Constituency u Bah Ba lajied Ranee uba la wanrah ïa kane ka mat kaba ïadei bad ka Shaw Bhoi namarba khatduh ïawai la lah ban pynrung ha ka Amendment Bill ba la mynjur ha ka sngi Thohdieng.
Da kaba pynpaw ba ka Clan Bill ka kham bun ïa ki bniat kiba nep ban ïa ka Lineage Amendment Bill, u Bah Chyne u la ong, ba kane ka dei namarba tang ka jingthmu jong ka Clan Bill ladep pynrung ha ka Lineage Amendment Bill ka bym don satia ïa ki bniat.
“Hynrei ha ka Lineage Amendment Bill ka shu long tang ban ai jingithuh ïa ki Seng Kur bad ban rejistar ïa ki hynrei ngim ïohi ba kan don ïa ka bor ban pynkupbor ïa ki Seng Kur,” ula bynrap.
