Nongpoh, K’Lyngkot 23: Ka ophis jong ka District Social Welfare Officer, Ri-Bhoi District lyngba ka tnad Sankalp District Hub for Empowering Women haka 22 tarik Kylla Lyngkot ka la sdang ïa ka jingrakhe kyrpang ïa ka jingdap 10 snem jong ka skhim Beti Bachao Beti Padhao (BBBP) kaba dei kawei na ki skhim kaba la pynlait paidbah naduh u snem 2015 daka jingthmu ban peit kyrpang bad ban pynioh ïa ka hok jong ki khynnah kynthei ban lait na kano kano ka jingshah lehbeiñ bad ka jingshah ban beiñ.
Ha katei ka jingsdang ban rakhe ïa ka jingdap 10 snem la wan ban ïa donlang da u MLA ka Nongpoh Bah Mayral Born Syiem kum u kongsan haka jingdonlang u Bah MB Tongper, ADC Ri-Bhoi kum u symbud kongsan, ka kong NF Sun DSWO, Bah S Thangkhiew Gender Specialist, District Hub For Empowering Women, ki ASHA ki Anganwadi lem bad kiwei kiwei.
Ha katei ka sngi kum ka jingpynshlur ïa ki kynthei khamtam ha kane ka juk ba mynta, na ka liang katei ka tnad sorkar ka la leh donburom ruh ïa ki longkmie kiba la lehbha ha ka imlang ka sah kiba kynthup naduh ka Kong W Dewkhait kaba trei kum ka Agandwadi, kaba dei ruh ka longkmie kiba la khur shibun ki khusnam bad ki nam jop ha ki jingïakop mareh thong kiba la long hapoh ka jylla bad kumjuh shabar ka jylla, nangta ka Kong M Rymbai, kaba la khur takma haka jingïakhun Asia Arm wrestling Cup kaba la mih khmat na ka jylla, ka Kong B Syiem, ka longkmie kaba don ka jingnang jingtip haki kam thaiñ jaiñ ryndia bad kaba kloi ruh ban hikai lem ïa kiwei ha ka thaiñ ka wet lem bad kiwei kiwei.
