Ïaroh u Lat ka jylla ïa ka jinglong kyrpang ka synshar paidbah ha Meghalaya

0

Shillong, K’ Lyngkot 25: U Lat ka jylla Meghalaya u C H Vijayashankar ha ka sngi Saitjain u la pynpaw ka jingïaroh halor ka jinglong kaba kyrpang ka kolshor jong ka Meghalaya, kiba la shong tynrai naduh ki jinglong ki trai ri trai muluk.
U la ïaroh ïa jinglong kaba kyrpang ka jingïashim bynta ki paidbah hapoh ki synshar shnong khamtam jong ki Khasi, Garo, bad Jaiñtia, kiba dei ki dor jong ka synshar paidbah.
Haba kren ha ka jingrakhe ïa ka National Voter’s Day kaba la long ha U Soso Tham Auditorium, Shillong, u Vijayashankar u la ïaroh ruh ïa ka Election Commission of India bad ka tnat elekshon ka jylla halor ki kam ban pynlong ïa ka elekshon kaba khuid ba suba, kaba laitluid bad kaba shit kaba shai khamtam ha ka 18th Lok Sabha election ha u snem 2024, kaba la sakhi ka jingïashim bynta ki nongthep kaba la long haduh 76.61%.
Ïa ka prokram, la pynlong da ka ophis Chief Electoral Officer, Meghalaya, kaba la rakhe ïa ka 15th National Voter’s Day hapoh ka theme “Nothing Like Voting, I Vote for Sure.”
Ha kane ka prokram la wan ban shim bynta ruh da u Bah D. P. Wahlang, Chief Secretary ka Meghalaya, u Dr. B.D.R.Tiwari, IAS, C.E.O bad ka kong Rosetta Mary Kurbah, IAS, Deputy Commissioner, East Khasi Hills.
Ha ka prokram la pynskhem ruh ïa ka jingaiti bad jingangnud jong ki nongshong shnong ka Meghalaya haba ïadei bad ki jingshongdor ka kam synshar paidbah bad ka bynta kaba kongsan jong manla u ne ka nongthep vote ha ka ban pynkhlaiñ ïa ka nongrim jong ka kam synshar paidbah.

Leave A Reply

Your email address will not be published.