Phah tuklar ka GOERA ïa ka Sorkar ban ïada na ka jingwan rung ki poiwir Bangladeshi sha India

Shillong, K’ Lyngkot 25: Ka Garo Omniscience for Ethnic Renaissance and Awakening (GOERA) ka la kyrpad ïa ka jingtuklar jong u Symbud Myntri Rangbah ka jylla uba khmih ïa ka tnat home (police) u Bah Prestone Tynsong ban shim ki sienjam ban ïada na ka jingwanrung beaiñ ki nong Bangladeshi ba kin wanrung shapoh ka ri India lyngba ka khappud kaba don ha jylla Meghalaya.
Ha ka shithi ba la phah sha u Bah Tynsong, ka GOERA ka la ong, “Ngi kyrpad ïa phi ban shim kam noh mardor ban pynbeit ïa kane ka jingeh.”
“Ki video kiba la saphriang halor kane ka kam, bad kadei ruh ka kam kaba dei ban kyndit bynriew ban ïohi ïa ka jingbym kheiñ burom ïa ki khappud jong ka ri bad ki jingjia ki jinglong jingman hapoh ka ri Bangladesh,” ka la ong.
“Ngi la sakhi ïa ka jingshah kem jong ki katto katne ki riew shimet ha ki jaka bapher bapher hapoh ka ri India. Ïa ki shipai Border Security Force (BSF) la dep ban ai ka jingshaniah bad ka jingkitkhlieh ban ïada ïa ki khappud jong ngi, hynrei ka paw pynban ba ki la leh bym suitñiew ïa la ki kam jong ki. Kumta dei halor kane ba la mih ka jingwan rung ki poiwir beaiñ shapoh ka ri khlem da pahara bha ha kaba kane ka la buh ka jingma ïa ka suk ka saiñ bad ki lada bad shong shngaiñ jong ka ri baroh kawei,” ka la bynrap.
Kane ka seng ka la kyntu ïa ka sorkar ba kan shim ki sienjam kiba donkam ban pynbun ruh ïa ki lad ai jingshngaiñ hapoh ki jaka khappud da kaba pynbun ruh ka jingdon jong ki shipai BSF ha shilynter jong u pud u sam ka India-Bangladesh kyrpang khamtam hapoh ka thaiñ Gillagora.
Haba ong ba ka long kaba kongsan ban buh ïa ki jaka peitngor ha ka jaka, ka la ong ba ka sorkar ka dei ban buh ïa ki CCTV camera bad kiwei ki tiar ban peitngor ban khmih ïa u pud u sam bad ban lap ïa ka jingïaid lyngba ba beaiñ shapoh u pud u sam.
Ka la dawa ïa ka jingshimkam kaba pyrkhing pyrshah ïa ka jingwan rung beaiñ da kaba ong, “Ka sorkar ka donkam ban pynthikna ba kine ki poiwir beaiñ dei ban bat bad ban phah biang noh mardor sha Bangladesh.”
Haba banjur halor ka jingdonkam ka jingtrei kaba khuid jong ki shipai BSF, ka GOERA ka la ong, “Ka jingtohkit ïa ka jingleh bym shim khia jong ki shipai BSF bad ban shim disciplinary action pyrshah ïa kito kiba la lap ba ki la leh ïa ki kam ba bakla.”