Shillong, K’lyngkot, 25: U Myntri Rangbah ka jylla Conrad K Sangma ha ka sngi Saitjaiñ u la buh mawnongrim na ka bynta ban tei ïa ka Umpdem, RCUP School ha ryngkat ka jingsakhi lang jong u MDC ka Mairang-Nongkhlaw Constituency u Bah Batskhem Ryntathiang, u Assistant Parish Priest jong ka Umsning Parish u Rev. Fr. Edward Sten, ka Deputy Commissioner jong ka Eastern West Khasi Hills ka Kong Anita Kharpor bad kiwei kiwei.
Kan long ka sien kaba nyngkong eh ba u Myntri Rangbah ka jylla un leit jngoh ïa ka shnong Umpdem kaba don ha Eastern West Khasi Hills district.
Haba kren ha kane ka sngi kum u kongsan, u Myntri Rangbah u la pynpaw ïa ka jingangnud jong u ba ka roi ka par kan poi lang markatjuh sha ki bynta bapher bapher ka jylla Meghalaya.
“Manla ki nongshong shnong bad manla kawei pa kawei ka shnong ka dei kaba kongsan tam ïa nga. Ka dei ka kamram jong nga kum u Myntri Rangbah ban pynthikna ba ki song pynroi bad ki lad ki lynti kin rung sha baroh ki kyndong kynshrot jong ka jylla, ym tang ha Shillong, Tura, ne Jowai,” u la ong.
Da kaba pynpaw ba ka pule ka puthi ka dei kaba kongsan tam, u Sangma u la ong, “ka jingpynlut ha ka pule ka puthi ka dei kawei na ki bynta bakongsan kaba pynthikna ïa ka roi ka par kaba jlan ha ka imlang ka sahlang. Ka jingbuh ïa u mawnongrim ha kane ka ka sngi dei ka sakhi jong ka jingkut jingmut jong ngi ban pynïoh ïa ka pule puthi haduh ki tyngkong iing jong iwei pa iwei i khynnah hapoh ka jylla.”
U Myntri Rangbah u la pynbna ruh ban ïarap pisa na ka bynta ki skul bapher bapher, kynthup ka jingïarap pisa kaba mar T. 5.96 lakh na ka bynta ka Nongkseh RCLP School, ka Shilliang Khri Umtrew Presbyterian Upper Primary School bad ka Umpdem RCUP School na ka bynta ban shna ïa ka hostel jong ki kynthei. Nalor kata, yn sa mang pisa sa T.1.5 lak na ka bynta ban thied tiar tem ïa ka Umpdem RCUP School.
Haba pynpaw ïa ka jingkiew artet jong ki samla ha ka tem ka put, u Sangma u la ong, “nga ïohi ba ki khynnah hangne ki don ïa ka sap ka phong bad nga sngewkmen ban ai jingkyrshan ïa ka skul da ki tiar tem. Kane ka dei tang ka jingsdang bad nga dang angnud shuh shuh ban ïohi ba kane ka skul kan nang kiew shuh shuh ha ka kyrdan kaba shalor ha ka jingbsa ïa ki umpohliew jingstad.”
U Bah Batskhem Ryntathiang, haba kren ha ka jingïalang u la pyntip ïa ki jingeh ba ki khynnah ha kane ka thain ki mad, naduh ka leit ka wan kaba rem.
“Ka dei ka thong jong nga ban pynsuk ïa ka leit ka wan ban poi sha ki jaka pule. Kane kan ïarap ïa ki khynnah ba kin poi sha skul ba kin tip ïa ka thoh ka pule,” u lao ong.
Ha kane ka sngi la aiti ha u Myntri Rangbah ar tylli ki dorkhas na ka Sister Grace Philip, kaba dei ka Superior jong ka Little Workers ka Sacred Heart Convent ba pan jingïarap ban shna ïa ka hostel ban pynsah ïa ki khynnah kynthei ha Umpdem RCUP.
Ka shnong Umpdem ka la ai dorkhas da ka jingkyrpad ban wanrah ïa ki kam pynroi kum ka surok ba pynïasoh na Nongkhlaw sha Umpdem, ka jingkyntiew kyrdan ïa ka Sub-center sha ka Primary Health Center (PHC), bad ka jingshna ïa ka madan ïalehkai phutbol.
Tang shu ïoh pdiang ïa kine ki jingkyrpad, u Myntri u la ong ba un pynthikna ba ka shnong Umpdem kan ïoh ïa ki kam pynroi ïa kiba yn sa leh khyndiat pa khyndiat khnang ba kin long ki jingmyntoi ïa ki paidbah nongshong shnong.
