Nongpoh, Nohprah, 04: Ka ophis jong ka District Social Welfare Officer, Ri Bhoi District ha ka jingtrei lang bad ka District Legel Service Authority Ri Bhoi District, mynta ka sngi ka la rakhe burom ïa ka sngi ba kyrpang jong kito kiba don jing duna ha ki dkhot met lane ka ‘International Day for Persons With Disability’ halor ka phang “Amplifying the Leadership of persons with disabilities for an inclusive and sustainable future”.
Ïa kane jingrakhe, la pynlong ha Patharkhmah Government Higher Secondary School ha kaba u Bah Sosthenes Sohtun, MLA Jirang u la wan ban shim bynta kum u kongsan ha ka jingdon ryngkat u P. Hajong, BDO ka Jirang C&RD Block, ka Kong N.F Sun District Social Welfare Officer Ri Bhoi District District, ka Dr K.Lyngdoh Medical & Health Officer CHC Patharkhmah, u Bah P. Thangkhiew Sordar Patharkhmah, u Bah Lewen Bey Assistant Legal Aid Défense Counsel, Nongpoh, ka Kong Joinmary Sakra Physiotherapy Civil Hospital, Nongpoh lem bad kiwei kiwei.
Haba kren ha kane ka sngi na ka liang u Bah Sosthenes Sohtun kum u kongsan, u la ai khublei ïa ka ophis jong ka District Social Welfare Officer ka Ri Bhoi District, ba ka la lah ban pynlong ïa ka jingrakhe ïa kane ka sngi kaba kyrpang na ka bynta kito kiba don jingduna ha ki dkhot met, bad kyntu ïa ki paidbah ba kin peit bad ithuh ïa ki nongshong shnong kiba don jingduna ha ki dkhot met, lyngba ki sap ba kyrpang jong ki ym lyngba ki jingduna kiba ki don namar ki long kumjuh hakhmat u Blei.
Ha kane ka sngi la pynlong ruh ïa ka Free Medical check-up, bad la ïoh ruh ban pynlong ïa ki jingïalehkai bapher bapher na ka bynta ki nongshong shnong jong kane thaiñ kiba don jingduna ha ki dkhot met bad la sam ruh ïa ki khusnam sha kiba don jingduna ha ki dkhot met kiba la wan ïashimbynta ha kane ka prokram.
Ha kane ka juh ka sngi naka liang ka ophis u Block Mission Coordinator, Umling BRC ha ka jingïatreilang bad ka HANS Foundation, Ri-Bhoi District ka la rakhe ïa katei ka sngi kiba duna ha ki dkhot met ryngkat ka jingsumar ei ha iing Dorbar Nongpoh ha kaba u Bah Mayral Born Syiem MLA ka Nongpoh u la shim bynta kum u kongsan bad u Bah Balajied Ranee kum u symbud kongsan ha ka jingdonlang kiwei kiwei ki riew rangbah baad ki ophisar naka tnad pule puthi.
